[dropcap]Л[/dropcap]аргсса нюжмардий, февраль зурул цанний, Аьрасатнал хъуншагьрулул дязаннивсса Журналистурал къатраву, чIявусса халкьгу бавтIун, сийлий кIицI лаглай бия Дагъусттаннал Журналистурал союзрал хъунама, яруссаннал миллатрал «ХIакьикьат» кказитрай 27 шинал лажиндарай каялувшиву дуллалисса Аьли Камаловлул 70 шинал юбилей.

Качар ХIусайнаева
«ЦичIав караматшиву да­къар. Юбилейрду дуллансса гъирардугу ливчIун бакъар. Халкь авара буллангу къачча, жула прессалун захIматсса чIунгу, жула отраслилул даражалул кьянатшивугу хIисавравун ларсун, юбилейрдан­сса тирхханну дакIниву дакъар», — тIий уссия Аьли АхIмадович муния аслу-суал буллалисса дустурахь.
Цала махъва-махъсса амрурдавух Р. АьбдуллатIиповлул къулбас дурну дия Аьли Камаловлун, ванал чIярусса шиннардийсса захIматгу, юбилейгу хIисавравун ларсун, «За заслуги перед республикой» тIисса орден дулаврил амрулий.
Амма, Камаловлул Дагъусттаннайссагу, Москавливссагу, цайми регионнаяссагу (Аьли Камалов Аьрасатнал Журналистурал союзрал секретарьгур) дустурал тIалавшиндарайн бувну, маслихIат хьуну бия февраль зурул цанний, увсса кьини, Москавлив Журналистурал къатлуву кIицI лаган. Да­гъусттаннал журналистикалул ветерантурал цIания ттуйнгу оьвкуна му мажлисравух гьуртту хьун.
КIюрххилсса самолетрал рейсрай бивну, жу аьркинний ливкру. Журналистурал къатраву актовый залданувун ссят ххюнний, ца дакьикьалулгу чIал къавхьуну, бувкIуна хIурмат лавайсса хъамал: дустал, коллегахъул, гъан-мачча. Мажлис бачин бан бакIрайн лавсун бия Аьра­сатнаву машгьурсса журналист, жяматийсса ишккакку, Аьли Камаловлул дакI тIайласса дус Сулиета Кусовал. Аьли Камалов барча ан бувкIун бия цIанихсса ва машгьурсса хъамал: уттигъанну цIуну увчIусса Аьрасатнал Журналистурал союзрал председатель В. Соловьев, хьхьичIавасса ва союзрал председатель В. Богданов, Аьра­сатнал ПрезидентначIасса Инсантурал ихтиярду дуруччай комитетрал председатель, Аьрасатнал Президентнал советник М. Федотов, Думалул Политикалул, информациялул технологиярттал ва связьрал комитетрал бакIчи Л. Левин, Москавливсса Дагъусттаннал представительствалул хъунмур З. МухIуттинова. УвкIун ия уттигъанну цала къуллугърая лавгсса Р. АьбдуллатIиповгу, чIярусса шиннардил лажиндарай Аь. Камаловлущал дусшиврий ивкIсса. Да­гъусттаннал Журналистурал союзрал председатель барча уллалисса телеграмма дуркIуна Дагъусттаннал Республикалул бакIчи Владимир Аьбдуаьлиевич Васильевлуягу.
Гьай-гьай, чIявусса бюххан­сса, цIардайсса махъру лавхъуна та хьхьуну юбилярная. ДакIнийн дичлай бия мукьцIаллийсса шиннардий Аьли Камаловлул миллатрал кказитрайгу, Журналистурал созрал хъунаманал къуллугърайгу дурцири давурттив. Бия, гьарцагу юбилейрал мажлисирттай чан бакъасса, ххаллилсса махъру. Ккаккан дурна «ХIакьикьат» кказитрал коллективрал хIадур дурну диркIсса Аь. Ка­маловлул оьрмулиясса чIирисса киногу. Итабавкьуну бия чIивисса буклетгу, гивугу ванал дустуралгу, даврил уртакьтуралгу, хIукуматрал къуллугъчитуралгу юбиляр барча уллалисса тIааьнсса махъру бия.
Мажлис чIюлу бан бувкIун бия яруссаннал машгьурсса балайчитал — Ххадижат Жамалуттинова ва Аьбдулла МахIаммадмирзаев.
Хъирив мукъуву Аьли Камаловлул цинявннахь барчаллагь увкуна. Цува ххишала акъа бусраврай, барчаллагьрай, хъанахъимур бювххун ушивугу бувсуна. «На нахIу махъругу, цIардугу ххираминнаясса акъа­ссара,- увкуна ванал. – Вайксса ххуй-ххуйсса махъру ттуява баллалийни, ламусравун агьара. Барчаллагь. На вания тихунмай ттунма итабавкьу­сса оьрмулул мутталий зул цIардан лайкьну щурун хIарачат банна», — куна.
Махъругу лавхъун, «торжественная часть» къуртал хьуну махъ хъамаллурах ялугьи бия дукралул бувцIусса ссупрарду. Гьай-гьайкьай, бия шикку яруссаннал ххункIгу, дурцIу дикIгу, буркивгу, чуттурдугу, цаймигу нахIу-нацIурдугу. Ва ялагу, туну, «ца-ца» банссаннух мякьминнан – Дагъусттаннал цIанихсса коньякгу, чяхиргу чан дакъая.
Ттунма кIулссаксса, ва ттухьва цIувххуну, ва ца Аьли Камаловлул чулухунмайсса хIурмат бакъар. Ттун къадакIнийри ттининнин дагъусттаннал журналистнах ва даражалий къулагъас дурну. Ва жула журналистикалул ххуйсса даражалул барашиннар тIиссара. Жула цинявнналагу чулухунмай­сса хIурматри. Му мукун хьуншиврулгу Дагъусттаннал яла чялишми, цала миллатрай ва культуралий дакI аьтIими арсурвавравасса цану хъанахъи­сса Аьли Камаловлулгу хъунмасса хIарачатгу був­ссар, захIматгу бивхьуссар. ХIазран бакъая, тIайламур халкьуннан бавну къаччинал, 1995-ку шинал лултту рургьуну, ванайн ххявххун бивкIсса. Аллагьнал цIимилийну, чIила къюкIлил чIарах дурккун ххассал хьуссия.
Жугу, ванал дустал, вания тихунмайгу чIа тIий буру Аьли Камаловлун гьарца дакIниймур бартлаганнинсса, оьрмулул уччиннин­сса мутта.