[dropcap]Щ[/dropcap]ала Аьрасатнаву кунна, Лакрал райондалийгу щи­риркIуну дур 2018 шинал мартрал 18-нний хьунтIисса Аьрасатнал Президентнал бувчIавурттайнсса хIадуршинна. Райондалул администрациялул бунни ми бувчIавурттан хасъсса хIукмурду.

[dropcap]У[/dropcap]рчIа инсанная сакин хьусса бувчIавурттал территориялул комиссиялул чулуха дачин дурну бур участкарттал коми­ссиярттал вакилтуран лахьхьин баврил давуртту, цалийн дуцлай бур избирательтурал сияхIру, кIул буллай бур цуку-цукунсса дахханашивуртту дурссарив Аьрасатнал Президент увчIаврил бувчIавурттал закондалий ва м.ц. Ми дахханашивурттая бувсунни райондалул Территориялул бувчIавурттал комиссиялул хъунама Илияс ХIажиевлул.
— Мяйжаннугу, тамансса дахханашивуртту, ххибавуртту дурну дур ва базилухсса бувчIавурттал Закондалий. Масалдаран, ца агьамсса да­хханашиву – Аьрасатнал Президент увчIинсса чIу булун бюхълай бур билаятрай ччимур бувчIавурттал участокрай.
— Цукунни му бантIи­сса?
— Цува усса кIанттая, яни чIу булайсса участокрая цамур кIанттайн гьан, цамур кIанттай чIу булун ччай ухьурча, цума-ухьурчагу избирательнал аьркинссар, бувчIавуртту хьуннин хьхьичIсса 45 гьантлул мутталия шихунмай бувчIавурттал кьининийн 5 гьантта личIаннинсса чIумул дянив цува чув чIу булун ччай уссарив ккаккан буллали­сса аьрза чичин. Мукунсса аьрза мунаща булун бюхъайссар ччарча райондалул (Территориялул) бувчIавурттал комиссиялийн, ччарча МФЦ-лийхчIин гьан бан, ччарчагу интернетрай «Единый портал» тIисса паччахIлугърал хIаллихшиндарал сайтрайн бутан.
Аьрзарду буцIин баврил дуссар цинна хасъсса кьяйдарду. Анжагъ территориялул комиссиялийн му аьрза булун багьлай бур январьданул 31-ния мартрал 12-ннийн бияннин, участкарттал
Комиссиялийн тIурча – февраль зурул 25-нния мартрал 12-ннийн бияннин.
Бур цамур журалул аьрзагу, мунийн хасъсса аьрза учай. Му аьрза булун багьлай бур бувчIавуртту хьун хьхьичIсса мукьва гьантлий, яни мартрал 13-нния мартрал 17-нин, ссят 14-ннияр чIал бакъа. Ва аьрзирал мурадгу избирательнал цува цумур участокрай чIу булун ччай уссарив ккаккан бавур.
Анжагъ хасъсса аьрза избирательнал прописка дусса кIанттайсса участокрайнни булайсса.
Цамургу дахханашиву.
Гьарца бувчIавурттал участок­рай бивхьуну бикIан багьлай бур зузисса компьютер. Му компьютерданий буцIин бан багьлай бур бувчIавурттал хIасиллу дуллалисса протокол. Компьютерданий мунин хасну дирхьусса программа дачин даншиврул участкарттайсса коми­ссиярттал 2 член хIадур хьусса икIан аьркинссар. ХIадур баврил давур­ттугу дурссар райондалул территориялул комиссиялул.
Компьютерданий буцIин був­сса, комиссиялул члентурал къулбасругу дурсса протокол яла бучIантIиссар райондалул избирательтурал комиссиялийн. Шиччагу протоколлал хIасиллу мугьлат бакъа гьантIиссар Аьрасатнал Центральний бувчIавурттал комиссиялийн.
— ЧIалачIисса камерарду бишин­тIиссарив участкарттай?
— 2000-ннияр ххисса избиратель усса кIанттай бишин ккаккан бувну бур камерарду.

Ихтилат бувссар
З. Тахакьаевал