[dropcap]Н[/dropcap]иттил мазрал кьинилун хасну МахIачкъалалив хьунтIиссар ххюлчинсса ниттил мазрал фестиваль. Цурдагу кIицI лагантIиссар юбилейсса шадлугъ хIисаврай.

З. АьбдурахIманова
[dropcap]Ш[/dropcap]иккува кIицI лаган, гьар шинах Яруссаннал миллатрал ва культуралул регионал автономиялул сакиншиндаралу ва кьинилун хасну цимирагу мероприятие дувайссар.
Гьашинумур фестивальданул сакиншиндаравух гьуртту хьунтIиссар ДР-лул Миллатирттал политикалул министерство, ДР-лул Печатьрал ва информациялул министерство, ДР-лул КIулшивуртту дулаврил ва элмулул министерство ва жяматийсса сакиншиннарду ва суккушиннарду.
Фестивальданул лагрулий февральданул 21-нний Дусшиврул къатлуву цалчинма-цалчин хьунтIиссар, муниципал районнал бакIчитал, элмулул ва интеллигенциялул вакилталгу гьурттусса, «ккуркки стол». Шикку хIакьину школарттай ниттил мазрал дар­сру дишаврил тагьар ва миллатирттал кказит-журналлацIун бавхIусса масъалартту ххал бигьинтIиссар.
Февральданул 24-25-нний Яру­ссаннал театрдануву фестивальданул яла тIааьнмур ва яргмур бутIа хьунтIиссар. Шикку нантIиссар яруссаннал печатьрал ва мультимедиалул продукциялул ва луттирдал ярмукIа, мукунна фотовыставка ва миллатирттал лаххи-ликкиялул флешмоб. Районная бувкIсса хъамаллурал, художествалул самодеятельностьрал коллективирттал ккаккан дувантIиссар цалла аьдатру, къавтIавуртту ва тIунтIиссар халкьуннал макьаннайсса балайрду. Гьарца шинал кунма, фестивальданул тамашачитуран къур бувну бикIантIиссар миллатирттал дукрардал ссупрарду, хъярч-махсарарттал конкурсру ва цаймигу тяхъашивуртту. ХIасил, ниттил маз ххираминнаща, мунил кьимат буминнаща ва шадлугърай бюхъантIиссар цала дакIнин малхIан хьунуксса гьур­ттушинна дуван.
Ахирданийгу Яруссаннал мазрал учительтурал ассоциациялул ва Яруссаннал СМИ-рдал ассоциациялул шинал мутталий личIи-личIисса арардаву хьхьичIун ливчуминнан бахшишру дулунтIиссар ва фестиваль къуртал хьунтIиссар Яруссаннал театрданул сахIналий спектакль ккаккан баврийну.