[dropcap]Я[/dropcap]нварьданул 30-нний Да­гъусттаннал бакIчинал кIа­найма Владимир Васильевлул ва «Газпром» ПАО-рал правлениялул председательнал хъиривчу Валерий Голубевлул дунни компаниялул региондалул политикалул комиссиялул гьартасса батIаву.

[dropcap]В[/dropcap]ладимир Васильевлул бувсунни газ агьалиначIан биян баву ва газрал турбардал тагьарданул масъалартту хъинну агьамссаннун ккаллину бушиву. Мунал мукунма бувсунни газрал турбардачIан, закондалуцIун къабавкьуну, къат­ри гъанну дурну душиву. Муния гьартану бувсунни «Газпром трансгаз Махачкала» ООО-рал гендиректор Александр Астаниннул. Мунал бусаврийну, хIакьину кампаниялул газрал щаллу буллай бур 10 шагьру ва 29 район. Бувсунни ДР-лул заллушиврий­сса газотранспортрал системалий­сса объектирдая, ми цукун зий ду­ссарив. А. Астаниннул бувсунни мукунма газопроводрал зоналий къатри дуллалаврил ва миннул хьхьичIалу кьукьин цалва буллалисса хIарачатирттая.

***
Январьданул 29-нний Да­гъусттаннал БакIчинал кIанайма Владимир Васильев хьунаавкьунни «Единая Россия» партиялул Ухссавнил Ккавкказуллал регионнал дянивсса координациялул советрал каялувчи, ПаччахIлугърал Думалул депутат Зураб Макиевлущал.
Хьунабакьаврий гьуртту хьунни Дагъусттаннал Халкьуннал Мажлисрал председатель Хизри Шихсаидов, ПаччахIлугърал Думалул депутатътал Заур Гекниев, Елена Бендаренко, Юрий Левицкий ва Артур Таймазов, ДР-лул БакIчинал ва ХIукуматрал Администрациялул каялувчи Владимир Иванов.
ХIадур бувссар
ХI. Аьдиловлул