[dropcap]Я[/dropcap]нварьданул 29-нний Дагъусттаннал БакIчинал кIанайма Владимир Васильев МахIачкъалалив хьунаавкьунни АьФ-лул экономикалул министрнал хъиривчу, ПаччахIлугърал, регистрациялул, кадастрданул ва картографиялул федерал къуллугърал каялувчи Виктория Абрамченкощал.

[dropcap]И[/dropcap]хтилат байбишин хьхьичI региондалул бакIчинал увкунни: «Барчаллагь вин, жу оьвкуну, республикалул хъуслил (аьрщарал) арардал масъалартту гьаз буллалисса чIумал, жучIан бучIаврихлу. Му агьамсса давур жун цIанасса ппурттуву».
Виктория Абрамченкол бувсунни республикалий ххуйсса инвестициярттал каширду душиву, аьрщарал ва хъуслил комплексраву личIи-личIисса аьрщарал ва объектирдал категорияртту бушиву. «Жун ххал хьунни МахIачкъалалив чIярусса къатри дуллай бушиву. Региондалулгу, кIанттул цилакаялувшиврул органналгу, жул къуллугъралгу цанницIун ца бавкьуну дуллалисса давурттайну бюхъантIиссар вай давур­тту мюнпатну чулийн дуккан дуван», — увкунни В. Абрамченкол.
Ихтилатраву кIицI бунни Генеральный прокуратуралул зузалтрал хъиривлаявурттайну ялун личин бувну бушиву къат­ри дан къабучIи буллалисса кIанттурдай аьрщив личIи дуллай бушиву къатри дуллан. Мукунма мунил бувсунни аьрщив ишла даврил планнугу, тIайлану дузал бувсса градостроительствалул документругу бикIан аьркинну бушиву къатри дулланнин хьхьичI. «Анжагъ махъсса 3 зуруй байбивхьуну бур федерал законну дуручлай къатри даврил ххуллий», — увкунни Росреестрданул каялувчинал.
Владимир Васильевлул бувсунни ми иширттал ххуллий закон лиян дуллан къабитантIишиву ва жаваблувшиврия цучIав мурахас къаувантIий бушиву.

ХIадур бувссар
ХI. Аьдиловлул