[dropcap]Я[/dropcap]нварьданул 22-нний ДР-лул БакIчинал дунни цаппара агьам­сса масъалартту ххал бигьаврин хас дурсса батIаву. Респуб­ликалул премьер-министр Аьбдуссамад ХIамидовлул бувсунни хIадурну бушиву зий байбишин ххюва цIусса школа ва хIадур хъанай бушиву лачIун буккаврил Европанал чемпионатрайн. Мукунма гьаз бунни бюджетниктуран харж булаврил буржру лахъаврил масъалагу.

«Муниципал сакиншиннардай тагьар укунсса дур: Зувиллий мукьва муниципалитетран харжру буллуну бур, цаппара шяраваллавун арцу хIакьину диянтIий дур, яла чIалну – гьун­ттий», — увкунни министртурал кабинетрал бакIчинал.
МуницIун бавхIуну, Владимир Васильевлул кIицI бунни харжирдал буржру уттигу лавхъун бакъашиву, цанчирча харжру цинявннал лавсун бакъа тIий. «Ми арцу Аьрасатнал Президентнал луртандалул фондравату ларсъссар, амма мигума жущара хъанай дакъар диян дуван харжру ласайминначIан. Миннул жаваб дулайминнан кIулну бикIан аьркинссар цалла жаваб­лувшиву. Жулла даврил агьамшиву – мунил хIасиллу хьун давур. Гьарца жура дуллалисса даву халкьуннан чIалантIиссар ва мунин кьиматгу агьалинал бищунтIиссар», — увкунни Владимир Васильевлул.
БатIаврий гьаз бунни цамургу агьамсса масъала. « Ларгмур нюжмардий Ленинккантуллал шяраву сукку хьуну дур лахъай­сса ххюттуканил азар (острая кишечная инфекция). Му азар лапра ппив къашаву мурадрай, жул хIукму хьуссия кIа шяравалу ца зурул мутталий Миатлиннал ГЭС-рал шамилчинмур къяртлуцIун дазин, щин марцI дуккан дайсса ультрафиолетгу дирхьуну. Тагьар захIматнихун дагьаврил сававну хъанай ду­сса дур махъсса шиннардий шяравалу хъун шаву, му шяраваллил цаппара инсантал, ихтияргу дакъанура, щинал бургъурдава щин ласласаву ми бургъурдава инсантурал ичIуннай най ду­ссар КОР-данува марцI дуккан къадурсса щин.
Владимир Васильевлул би­ттуршиндарал властьрал органнал каялувчитурайн ва муниципалитетирттал бакIчитурайн тапшур бунни ччясса мутталий МахIачкъалаллал лагмасса шяраваллал жямат марцIсса щинал щаллу баврил масъала чулийн буккан буван.
Муния махъ Владимир Ва­­­сильевлул бувчIин бунни Ма­хIачкъалалив аьрщарал арардал хIакъираву хъинну жапа­сса тагьар хIасул хьуну душиву, гъараллу дусса чIумал, шагьру щинахьхьун лаглай бур, шагьрулул цаппара кIанттурдай чанирдугу лешлай бур, щингу лакьлай бур.
«Бири-биривний къатри дуллай, градостроительствалул ва санитар нормарду ва кьяйдарду къадуручлай тIий, бугъ хъанай дур шагьрулул социал, коммунал, инженер, транспортрал ва цаймигу инфраструктурарду. Мунияту хъуншагьрулул мэрнал хIакъираву силистта бачин баву ва цаймигу мукуннасса давуртту дуллалиссар низам цIакь даву мурадрай», — увкунни Васильевлул.

ХIадур бувссар
ХI. Аьдиловлул