[dropcap]Л[/dropcap]аргсса нюжмардий «Дагестан» РИА-лий хьунни ДР-лул лайкь хьусса артист, «Голос – 6» проектрай ххув хьусса Селим Алахяровлущалсса хьунабакьаву. Селим Москавлия ца-кIива гьантлийсса увкIун ия ватандалийн, нитти-буттачIан иян, ватанлувтуращал хьунаакьин. ЧIявумиллатру бусса республикалул СМИ-лул вакилтурал Селимлухьхьун булунсса суаллу чIявуя.
Бадрижамал Аьлиева
— Селим, дустуращал, гъанчунащал хьунаакьинсса мутта бириврив шихун увкIун махъ?
— Цалсса къабиривунни. ХIакьину, гьунттий хьунаакьинна. Нитти-буттащалагу вари чинну уттигу щякъаивкIра, ихтилат къабав. РахIатну шану лахъанссавагу мутта къабиривунни финалдания махъсса царагу хьхьу-кьини.
— Инава ххув хьушиву кIул хьусса чIумал, ци асарду бия вил дакIниву? Дагъусттанлувтурал, цайминнал дуллалисса чIаравбацIаву щуркIал хъанай дияв?
— Ххувшаву – му хъунмасса талихI бур, гьай-гьай. Амма на финалданийн ияннин бумур хIалдания лавгун ияв, ттулла ххувшаврия ххари хьунсса гуж чурххай ливчIун бакъая. На хьхьичIа-хьхьичI ххарину уссияв ттула чIарав бацIлай бивкIсса цинявппагу инсантуралгу, ттулвагу хIарачат бакIуйн буккаврия.
Гьай-гьайгу, ттула халкьуннал чIарав бацIаву гьакссагу кIул хъанай дия. Ва жулла цинявнналлагу аьмсса ххувшавур.
— КIулссаксса, ина проектрая махъ Александр Градскийл
«Градский-холл» театрдануву зун ивкIунна. Цукун кьамул увра ина му театрданул?
— Александр Градскийл ттуйн муниннинма оьвкуна театрдануву зун, нагу, гьай-гьай, рязий хьура. Ттунсса хъунмасса пахрур – му даражалул театрдануву зун. Ххаллилсса зал бур. Шиккува учин, Москавлив хьуминнан маслихIат бавияв чара бакъа биян му театрданувун, тиккунияр ххаллилсса чIугу, чанигу зун чувчIав къаккавкссар ва къабавссар. Аппаратурагу мукунма.
Дебютгу ххуйсса даражалий хьунни: на щаллу бувсса Магомаевлул, Высоцкийл балайрду ххуйну кьамул бунни тамашачитурал.
— Самолетрая ливккун махъ хьусса, республикалул культуралул министр Зарема Ажуевнащалсса хьунабакьаврий ина кIицI лавгунни республикалий вилалусса концерт дулунсса пикри бушиву…
— ЦIанасса чIумал сольный концерт (Дагъусттаннай дакъа, Чачаннавугу, цайми республикарттайгу ккаккан дувантIисса) хIадур даврил хIакъираву чIявусса сиптарду, маслихIатру бур. Къаччива анавархъиндарай дуван му даву, цаппарасса барзру, чIун къаларгнура, къахъирив лаянссара му хIадур дуван.
— Вил репертуардануву хьунтIиссарив вила ниттил мазрайсса балай?
— Ттул репертуардануву цIанава буссар ниттил мазрайсса кIива балай. Ялуннин лазгири мазрайсса цаймигу балайрду ххихьунссар тIий ура.
— Соцсетирдай ххувшаврищал ина хьхьичIа-хьхьичI барча увминнавух ия Чачаннал Республикалул президент Рамзан Кьадиров. Мунал вийн цачIанма хъамалугу оьвкурив?
— На барчаллагьрай ура мунайн ттухра дурсса къулагъасрахлу. Барча баврия тиннай жул кIулшаву къархьунни. Та-бунугу мунащал кIул хьунссару, хьунабакьинссару тIисса умуд бур.
— Финалданий щаллу бувансса балайрду инава язи бугьайссияв ягу Александр Градскийл?
— «Кьурукьру» личIаннин, вайми циняв балайрду Александр Борисовичлул язи бувгьунни. «Кьурукьру» тIисса балай щаллу буван ттун ччянива ччай буссия, му чIивиния шинмайва ттунма ххирасса балайри.
— Инавалу шава усса чIумал, вихьва инава цуми балайрду тIий икIара?
— Ттул ттухьва нава, майрал лув, балайрду тIун икIайсса аьдат дакъассар. Шава усса чIумалгу ягу багьайкун балай тIийра усса, ягу – кьаивкIун. Ттул буссар хасъсса къатта, шумоизоляциялущалсса, чIаххуврайн къия къадиян. Финалдания махъ, шавай увкIсса чIумал, чIаххуврал на личIи-личIисса плакатирттащал, ххарину-шадну хьунаавкьунав.
