Жула оьрмулул ххуллий хьунабавкьусса, гъанну кIул хьу­сса инсантурава цавай хъамабивтун лякъай, цавайгу тачIав дакIния къабуккай.

[dropcap]Т[/dropcap]тухьра хьхьичIра-хьхьичI дарс дирхьусса учительница Хъассихъал РайхIанатлуя байбивхьуну, ттунма ххирасса учительтал дакIний бикIай мудан.
Хъамакъаитайминнавасса цану ттун хьуссар Читтуратусса МахIаммадлул арс Нураттин Маммаевгу.
На бачIи классравун Гъумук дуклан увхсса чIумал, аьпабиву, Нураттин Москавуллал университетраву дуклай ивкIун ия. Тания махъ ларгунни шинну, экьиларгунни Хъуннеххал чIярусса щин. ЦIана ххюцIалунния лирчусса шинну хъанай дур Дагъусттаннал мединститутраву (академиялуву) нава дарс дихьлай. Ттун хъинну кIулли учительнал пиша.
ХIасил, кьинирдал ца кьини Гъумук нава дуклакисса школалийн увкIуна Москавлив марцIсса ххювардай университет къуртал бувссар тIисса учитель, ганиннингу жула школалий мусил медаль ларсун ивкIсса. Циняв бия му, ваца тамашалун куна, цаннан ца кка­ккан уллай. Дихьлан ивкIуна му жухь математикалул дарс, ххирагу хьуна чIирисса чIумул мутталий. Бувххуна ттул чурххавун гъира Нураттиннуха лавхьхьуну школагу къуртал банна, яла университетгу буккинна тIисса. Щукру Заннайн, гъира мурадир­ттайнгу бувккуна – ларсъссар на мусил медаль.
ЦIанасса чIумал, пикри барча, ттун бувчIунни Нураттиннун бищунсса яла лаваймур кьимат ттула оьрмулуву му нара ларсъсса медаль хьушиву. Цалла дарс, пиша лавайну кIулшивруцIун, га ия иминсса, пахру-ххара бакъасса чув-адамина. Ганал ххювардай дуклакими личIи къабайва дянивну дуклакиминная, чIу лахъ къабайва щийнчIав.
Жухь математикалул дарс дишайсса Амирханхъал Аьлиша, ягу физикалул дарс дишайсса Эльза Алексеевна нажагь къашай хьурча, миннахлу дарс дишайва Нураттиннул. Жу махIаттал шайссияв ганал доскалий усттарну, циркIулданул къадишинну, ккюрнутIай (круг), трапеция, ка къадуркьун, мелданух дишайсса куццуй. Гьунар бусса учениктал ганан най буна хIисав шайва, чIун дусса чIумал, дарсру миннан хъиннура куртIну лахьхьин данмур байва. Нураттиннул хъиншиврия оьрчIру кувннахь кув буслан бикIайва. Аькьлулулгу увччу­сса, дакIгу авадансса инсан ия Нураттин.
Москавуллал ца яла цIанихмур вузгу бувккуну, Лаккуйн, цала бу­ттал кIанттайн, зун учIаву виричушиву дакъарив.
Аьпабиву, Чалабов Ибрагьиннул, директорну зузисса чIумал, школалул хIаятраву тIутIал багъ буллай, дакIний бур Нураттингу хIала увххуна. Мукунма, спортзал буллалисса чIумал, кьюкьлуй бавцIуну, цаннахьхьун ца буллай нани бувсса чартту кьамул буллай, гай саргъунну бишинсса куц кка­ккан буллай Нураттингу икIайва. Школалул хIаятраву 10-15 журалул тIутIив дургьуну дикIайва – пионну, георгинну, астрарду, хъункIултIутIив, пархтIутIив, гладиолусру, някIуннарал къатIри. На нара кIива журалул гладиолусру ххяххан дурну тIий, хIукуматрал Хъун елкалийн Москавлив Кремлилувун гьан увнав 6-мур классраву дуклаки­сса чIумал, жула школалиясса делегациялущал. Жагьилсса учитель Нураттин МахIаммадович увкIуна жу тIайла буккан. Жухь Москавлив ци ххал дан аьркинссаривгу, ци-ци кIанттурдайн чун-чун биян­ссаривгу бувсуна.
Нураттиннун хъинну ххирая музыка, исвагьину бищайва мандолина.. ДакIний дур, жуна ххирасса Акнихъал Шагьимарданнун 50 шин хъанахъисса юбилейрай, Нураттиннул мандолина бивщуну, нава ла­кку балай увкусса кьини. Му чIумал рирщусса суратгу дуссар жунний. Гъинттул нава отпускалий Лаккуй увкIсса чIумал, Нураттиннул, хьунаавкьукун, ца яла гъансса маччачунал къабансса ихтилат байва ттущала. Аьпабиву, ттула нинугу хъинну ххирая мунан, школа-интернатрай зузисса.
Оьрмулул лахъишиврий цавай халкь хъамабитай, цавайгу мудан дакIний личIай. Нураттин ия цала Аллагьнала ляхъан увсса учитель. Ттун къаккавкссар хIурмат буну-бакъа Нураттиннуя жагъалану гъалгъа тIисса инсан.
Ччяни жуятува личIи хьурчагу, МахIаммадлул арс Нура­ттиннул цIагу, давурттугу тачIав хъамакъаритантIиссар.
На хъинну ххарира цахава лав­хьхьусса, цалла цIа хъиннура бюхттул дансса, жунма цинявннан пахрулунсса агьлу-авладгу ванал кьабивтун тIий.
Кьалияхъал Ибрагьин,
Аьрасатнал ва Дагъусттаннал лайкь хьусса хIакин