Аьлил арс Оьмаров Оьмар
Ларгсса шинал декабрь зурул 23-нний, захIматсса цIуцIаврища ххассал къавхьуну, лавгунни дунияллия Ккуллал шяравасса ххаллилсса инсан, экономикалул элмурдал доктор, Аьрасатнал лайкь хьусса строитель, Оьмархъал Аьлил арс Оьмар.
Увссар ва Ккулув 1960 шинал Аьлил ва Муъминатлул кулпатраву. ЧIивину унува пагьму бусса, дуккавриву итххявхса оьрчIал мусил медальданущал къуртал бувссар школа ва дуклан увхссар Дагъусттаннал политехнический институтрал инженертал-строительтал хIадур байсса факультетрайн. Мугу ятIул дипломращал къуртал бувну, зун айивхьуссар «Горы» программа бартдигьлагьисса идаралий. Шикку зий унува, политехнический институтрал аспирантуралувунгу дуклан увхссар. Экономикалул элмурдал кандидат хьунсса диссертациягу дурурччуну, цала пагьму-гьунаргу, бюхъу-бажаргу ккаккан бувссар. Гьунар бусса сакиншинначи ва каялувчи Оьмардул сакин дурссар мукуннасса къатри дувайсса организация, «Альфастрой» тIисса. Ва идаралул учредительгу, гендиректоргу цува хьуну, тамансса къатри дурссар жулла районнай.
Оьмар уссия цала даврицIун дархIусса кIулшивуртту куртIгу, цIакьгу дуллайнувасса минахур, аьлимчу. Экономикалул элмурдал докторнал цIагу ларсъссия. Дагъусттаннай дакъагу, Оьмардул каялувшиву дуллалисса идаралул къатри дурссар Чачаннаву, Ставропольлай, Буденновскалий, Краснодардал крайрай.
Оьмар дугърисса, инсаннан ка-кумаг буван анавар уккайсса, хIал бавкьусса, дакI-аьмал хъинсса зунтталчу уссия.
Оьмар ахиратрал шаврил кьурчIишивугу кIидачIлай, дакIнихтунусса жижара буллай буру Оьмардул аьзизсса кулпатрахь Къишттухь, душварахь, арсурваврахь, ссурваврахь, уссурваврахь, куявтурахь, ссурахъаврахь ва цинявппагу гъан-маччанахь. Оьмардун къабуллусса оьрму махъминнан булуннав. РухI хъинний дишиннав, алжаннул ххари аннав, гьаттай нур дизаннав.
Ккуллал жяматрал цIания Давдихъал Кьурбан
КьурбанмахIаммадлул арс МухIадов Камил
Уттигъанну аьпалувух ивхьусса КIямашрал шяраватусса МухIадов Камиллул 52 гьантта хъанай бур вай гьантрай.
Камил увссар КIямашрал шяраву 1958 шинал.
ГьунчIукьатIрал школа къуртал бувну махъ вайннал кулпат бивзссар МахIачкъалалив. ХIукуматрал давурттайгу зий, дугьарасса ниттихгу уруглай икIайссия Камил. Камил ия дакI хъинсса, чин къаччан бикIан къабувайсса инсан. Оьрму кутIасса бивкIун бур, бунагьирттал аьпа бивул.
Камиллул бивкIулул кьурчIишиву кIидачIлай, жижара буллай буру уссихь Асадуллагьлухь, ссурваврахь ПатIиматлухь (БатIахь), Жамилатлухь, Розахь, уссурваврал хъаннихь, вайнная бивзминнахь, ссурахъаврахь ва щалвагу Заннихъал агьлу-авладрахь. Камиллул рухI алжаннул ххари даннав, гьав нурданул дуцIиннав. Ганан бакъасса оьрмулул бутIа махъминнан булуннав.
КIямашрал жямат
Хъуннасса пашманшиву кIидачIлай буру оьрчIахь ва махъсса щалагу агьлу-авладрахь,
Мусал арс Гъазиев Аьли
аьпалухьхьун лагаврийн бувну.
ХIамзаев ХIажи, Ибаев Жабраил,
2-мур ЦIувкIул
МахIаммад-Рамазаннул арс Мажидов Илияс
Вай гьантрай, Москавлив операция буван лавгсса кIанттай, му буваннинна къюкI дарцIуну, хар-хавар бакъа лавгунни дунияллия 1- мур ЦIувкIратусса ххаллилсса инсан, захIматрал ветеран, Дагъусттаннал лайкь хьусса учитель МахIаммад-Рамазаннул арс Мажидов Илияс.
Увссар ва 1947 шинал ЦIувкIуллал шяраву. Мяйва класс къуртал бувайхту, дуклан увххун ур Буйнакскаливсса педучилищалийн. Учительнал оьрму байбивхьуну бур Ккуллал шяравусса школалий. Ряхра шинава буттал щяравусса школалийн зана хьуну, тарихрал дарсру дихьлай ивкIун ур. Дагъусттаннал университетрал историялул факультетгу къуртал бувну, хъунмур оьрму хас бувну бур буттал шяраваллил оьрчIан кIулшивуртту ва тарбия дулаврин. Ванал бюхъу-бажар чIалай, школалул директорнугу ивтссия. Зий уссия шяраваллил администрациялул хъунаманугу, Ккуллал райондалул администрациялул хъунаманал хъиривманугу. Чув ци давурттай зурчагу, МахIаммад-Рамазанхъал Илияслул цува даврил пагьму бусса, низам, тIайлашиву ччисса ушиву ккаккан бувссар. Лайкь хьуссар паччахIлугърал чулухасса личIи-личIисса наградарттан. Дагъусттаннал лайкь хьусса учительнал ва Аьрасатнал кIулшиву дулаврил бусравсса зузалал цIарду ларсъссар. Мудангу чялишну хIала уххайссия шяраваллил оьрмулуву хъанахъисса иширттавух, оьнийгу, хъиннийгу чIарав ацIайссия. Дуклаки оьрчIал ва нитти- буттахъал дянив икIу, шяраваллил ва райондалул агьалинал дянив икIу, Илияс хIурматрай уссия, даврил уртакьтуравугу сийлий уссия.
Илияс дунияллия лагаврил кьурчIишиву кIидачIлай, дакIнихтунусса жижара буллай буру кулпат Розахь, арснахь, душваврахь, миннал наслулухь, уссурваврахь, ссурваврахь, цинявгу гъан-маччацириннахь. Яраппий, Илияслун къабуллумур оьрчIан булуннав, ляхъиндаран ххуйсса бакъа хавар къабаяннав. Илияслул рухIгу бигьаний дишиннав.
1-мур ЦIувкIуллал жямат
Уссурвал Кьурбан ва ХIусайннул аьпалун
Вай ци ххитри ххуллийхсса,
Вай ци халкьри нанисса?
Вай леххаврий нанисса
Кьурбаннул дустал бури.
Зунтту зурзу тIий бияв,
РатIру хъюлчай тIий дияв,
Варайннал къума ратIув
Ина жан дуллалийни.
КIай бюхттулсса барзунттайх
Ттурлу даркьуну дури,
Вил циняв гьалмахтурал
ДакIру къуману дури.
ГъалбурцIил дакIру дусса
Вил уссурвал ва ссурвал,
Кьурбан, вил хаварданул
Гъюжу буккан бувунни.
Тти вил хъуннархьу бава,
Ци буслай, хъяврин дави,
ХIусайн хъамаитаннин
Вил хIасратгу дуллусса!
Ттухь цал макIлил бувсуна,
Ттул аьзиз уссу Кьурбан,
Щюлли тIутIаву майдан
Вин хIадур був кIанур тIий.
Зунттал хъачIру – уссурвал,
Мурадирттайн къабивсса,
ХIайп бакъаяв зул чурхру
Гьаттал хIавтIливух бишин.
Гъумучиял Хъунмизит
Малланал къаттаявав,
КIа, цинявннан цачIусса,
Ххув Заннал къаттаяхха.
Зун алжан нясив баннав,
Аьрщи-хIатI кIукIлу хьуннав,
Зун ххирану бивкIминнан
Зухлу оьрму булуннав.
Зулцириннал цIанияту ссу ПатIимат
АьвдурахIманнул арс ХIажиев Ибрагьин
Оьрмулул 75 шинаву аьпалухьун лавгунни ХIажиев Ибрагьин Аьвдурахlманнул арс.
Ибрагьин увну ур Кlундиннал шяраву 1942 шинал Аьвдурахlманнул ва Патlиматлул кулпатраву. 1965 шинал буттал шяраву школагу къуртал бувну, Ибрагьиннул бувккуну бур Дагъусттаннал педагогикалул институтрал биологиялул факультет. Чlярусса шиннардий Ибрагьин зий ивкIссар КГБ-лул давурттай: Лакрал райондалул КГБ-лул начальникну, Каспийск шагьрулул КГБ-лул даврий. Мунан дуллуну дур 5 медаль ва юбилейный знак «70 лет ВЧК КГБ» тlисса.
1990 шинал Ибрагьин увкссар пенсиялийн подполковникнал чиндалуву. Даврий акъанугу, Ибрагьин гьарца байрандалущал барча ан бучlайва мунал даврил уртакьтал.
Дустал ххирасса, дакl тIиртIусса Ибрагьин шава щяивкlун акъая.
Кlундиннал жяматрал му увчlуну уссия цала советрал председательнугу. Цува ци даврий унугу, Ибрагьиннул цачlана увкlсса инсан щаллу къаувну итакъаакьайва. Цува зузи кlанай бикlу, ялапар хъанахъиний бикlу, Ибрагьиннул лагма бикlайва чlявусса гьалмахтал.
Ибрагьин ия ххуйсса ихтилатчи, ххаллилсса дус ва насихlатчи, лажин кlялану гьарца давриву цува чlалачlи айсса зузала. Шяравугу, райондалийгу бусравсса инсан.
Ибрагьиннул ва мунал кулпатрал хъуни бувну, тарбия бувну бур ххаллилсса душ ва арс.
ДакIнихтунусса кьурчlишиву кlидачlлай буру мунал кулпатрахь, оьрчlахь ва махъсса цинявппагу гъан-маччанахь. Ибрагьиннул бунагьирттал аьпа баннав.
КIундиннал жямат,
дустал, гьалмахтал
