[dropcap]В[/dropcap]ай гьантрай ДР-лул премьер-министр Аьбдуссамад ХIамидовлул каялувшиврулу хьунни ХIукуматрал пландалий дакъасса батIаву, муний ххал бивгьунни бюджетрал бутIул зузалтран декабрь зурул харжру къабулаврил хIакъиравусса масъала.

[dropcap]А[/dropcap]ьбдуссамад ХIамидовлул дакIнийн бувтунни, дукIу декабрьданий, Да­гъусттаннал БакIчинал кIанайма Владимир Васильевлул тавакъюрайн бувну, Аьрасатнал Президентнал Луртандалул фондравату республикалул ларсун диркIшиву 3,2 млрд. къуруш арцул, бюджетрал бутIул зузалтран харжру булуншиврул. «Декабрьданул ахирданий миннал ласун аьркинну бивкIссар харжирдал 40%, ливчIми, булун кка­ккан бувну бивкIссар ЦIусса шинал байранная махъ. Амма аьрзарду бувкIунни цаппара идарарттай зузалтран харжирдал авансру дулун къархьуну бушиврул хIакъираву», — увкунни Аьбдуссамад ХIамидовлул. Мунал бусаврийн бувну, гьарца аьрза личIину ххал бигьинтIиссар ва миннул анализгу дантIиссар, яни кIул дантIиссар харжру къабулаврил сававр­тту. Му масъала дузал баншиврул, Аьбдуссамад ХIамидовлул пикрилийну, аьркинну бур министрнал харж ласун так мунал каялувшиврийсса циняв ведомстварттал, идарарттал зузалтрал харжру лавсун махъ. Мукун барча, министрнан хIакьину кIулну бикIантIиссар циняв зузалтрачIан харжру бивну буссарив ягу бакъассарив.
ЛичIину ххал бивгьунни харжру цила чIумал булаврил масъала муниципал районнай ци тагьарданий буссарив. ДР-лул финансирттал министр Юнус Сяъдуевлул бусаврийну, миккугу хьуну бур харжру булун чIал хъанахъисса ишру. Премьер-министрнал тапшур бунни, хъирив лавну, кIул бан цуми районнай цила чIумал къабуллуну буссарив бюджетниктуран харжру. «Ми иширттал хIакъираву финансирттал министрнал аьркинссар гьар зурух бусаван», — увкунни Аьбдуссамад ХIамидовлул.

Жул корр.