[dropcap]Л[/dropcap]авгсса бигьалагай гьантрай ахиргу бувунни МахIачкъалалив циняв ялугьлай бивкIсса марххала. КIинтнил кIилчинмур зуруй марххала баврийгу цичIав ляличIисса дакъар. Амма гьашинугу, чIалачIиссаксса, хъуншагьрулул къуллугъчитуран кIи дуркIнуккар «цакуну», ххуллурдайн бичинсса къун хIадур бансса мутта къабуллуну, ми бичлансса техникалул дузалшинна дан къабивтун, халкь бачай ххуллурду микI-марххалттануцIа марцI бан аьркиншивувагу дакIнийн къабагьну.

Залму АьбдурахIманова
[dropcap]Г[/dropcap]ьаксса ссавур дурунни декабрьданулгу, ва зурул бачIиссаннулгу. ХIакьину мюрщи оьрчIангума кIулли, телефоннавун був­ххун, гьавалул тагьар кIул дан, ялун нанисса нюжмардий марххала, гъарал дикIантIий дурив ххал бан. Жулами къуллугъчитуран та ла­хьхьинавав ялун нанисса чIумуха зун, гъараллу, марххалтту булланнин кучардайсса «ливневкарду» марцI дуллан, кьаркьсса, дарусса кьинирдайва щинал, канализациялул турбарду баххана буллан, газрал, ттукIрал давуртту дуллан?
Ххуллун кьинива буллай байбивхьусса кIира-шаннасса кьинилул чIалачIи бувунни ва ххуллухгу шагьру кIинтнийн хIадурну къабивкIшиву. Ми гьантрай Дагъусттаннал социал сетьру щара лавхъсса хъун кIункIур хханссия. ЧIявуми бия, ххуллурдай ччех дикIру дуну, щусса машинарттал бан-бит бакъа ливчIсса заллухъру. Цавай бия , щала шагьрулувух бувкру, амма чувкIуй мар­ххала букьлакьисса я техника, я чIатIри-цIушащалсса зузалт ххал къавхьунни тIисса. Итни — кьини маршруткартту, автобусру занан къахъанай, чIявусса халкь вузирдавун, школарттайн, давурттайн чIал хьу­ссагу бия.
Яла ххарими ва марххалттания неъмат ласун мурччайх маз буклакими мюрщулт бия. Хьхьунил чIумал шагьрулул кIичIирттаву оьрмулун нигьачIийнугу, нитти-буттая кьюлтIну машинарттацIун лавчIун ччехру бигьлагьисса оьрчIацIун, жагьилталгу чансса бакъая.
Анаварсса батIавуртту дуллай къуллугъчитал цаннащал ца дяъвай, тахсир бума ляхълай буна, марххалагу бавцIуну, даслан диркIунни гьарзат. Гужсса гъарал лачIаву ва хъунмасса марххала бассаву –жула хъуншагьрулул буруккинттацIун ца ялунссагу «цIуцIи кIану» бунуккар.
Дарчунни кIичIирттавух чапалсса щинал нехру, гьаз хьунни ххуллурду лахъан шайсса тагьар дакъар тIисса леххавурттугу. Шагьрулуву къатри къадуллалисса мурцIу ба­къахьувкун, марххалттанил хъирив кьяркьаравун бахьлавгунни уттигъанну кIяла памма бавкьуну бивкIсса кIичIиртту ва ххуллурдугу. Шяраваллавурагу дакъасса кьяркьаравун кьувтIуну бур цIана МахIачкъала. Цаппара гьантрава баргъ бивтун, вайгу кьакьанссар, бурги яла жула кучардайсса ххи­ттух. Вайннулгу буруккин къабувну ци бави, я башинсса, ягу чIивисса харжирдах багьандаран бавхьуну гьан байсса шагьрулул къуллугъру бухьувкун жучIава.
КъакIуллича! Сайки 20-30 шин хъанай дур ттул МахIачкъалалив яхъанай, амма ттинин цалагу «цила чIумал кIи дуркIун» дакIний бакъар. Бизар хьунна му « цакуну» дучIайсса кIинтнил хаварданиягу, нач-нигь дакъасса къуллугъчитураягу…