Ттигъанну аьпалухьхьун лавгунни Вихьуллал шяравасса, бусса оьрму шяраву колхозрай зий гьан бувсса ххаллилсса ризкьичи МахIаммадов ХIамид Юсуплул арс.
Юсуплул арс МахIаммадов ХIамид
[dropcap]Х[/dropcap]Iамид увну ур июль зурул 15-нний 1935 шинал Вихьуллал шяраву. Оьрмулул кIира шинаву нинугу диркIуну, укуннагу захIмасса дяъвилул шиннардий ялун ппугу дунияллия лавгун, мукьва класс къуртал байхту, та никирал чIявусса оьрчIан кунма, гихуннайсса дуккавугу кьариртун, хIухчуну зун багьну бур ХIамидлун.
Шанна шинай аьралуннаву къуллугъ бувну зана хьуну махъгу, цала даврийн кIура авну, колхозрал яттил бригадалий каялувшиву дуллай ивкIссар. Ванал каялувшиндаралусса бригада мудангу ца яла хьхьичIунсса бивкIссар. Лайкь хьуссар паччахIлугърал чулухасса чIяру-чIярусса наградарттан. ЗахIматсса оьрчIшиву сававну, чIивисса оьрмулий хъуниминнащал архIалсса хъар цайнна ларсун зун багьсса ХIамидлул цала кулпат Ххадижатлущал, захIматрал кьадругу кIулну, ризкьилуха, аьрщараха зузиминнал хIурматгу буну, хъуни бувссар ацIва оьрчI: мукьа арс ва ряхва душ. Миннава урчIуннал ларсъссар ларайсса кIулшивуртту ва цивппа зузисса кIанттурдай бусравну ва хIурматрай буссар. Буттал буттан цIа дирзсса хъуна-хъунама арс Юсуп хIакьину зий ур Лакрал райондалул бакIчину.
ХIамид дунияллия лагаврил кьурчIишивугу кIидачIлай, дакIнихтунусса жижара буллай буру кулпатрахь, арсваврахь, душваврахь, миннал наслулухь, щалагу агьлу-авладрахь.
ХIамидлул рухI бигьаний дишиннав, Алжаннул ххари уваннав! Махъ ливчIминнал оьрмурдай барачат бишиннав!
Вихьуллал жямат
Мирзал арс Оьмаров Оьмар
Хар-хавар бакъа, апатI хьуну, жула дянива лавгунни жула аьзизсса Оьмар.
Мирзал арс Оьмаров Оьмар
[dropcap]О[/dropcap]ьмар уссия чIявусса дустал лагма бусса, чIаххувращал, гъанссаннащал хIал бавкьусса, дакI аьчухсса инсан. Увссар Оьмар 1955-ку шинал Ккуллал райондалий СумбатIуллал шяраву. ЧIивиния шинай захIмат ххирасса Оьмардул дургьуссар яттихIухчил ттархь, машиналул руль. Вай давурттай зий ивкIссар СумбатIуллал колхозраву. Ларсъссар чIярусса бахшишру ва барчаллагьру.
Махъсса ацIния ряхра шинал мутталий зий уссия СумбатIуллал касмулий, муххал ххуллул мастерну Ачи станциялий.
Ятинталну ливчIунни ванал шама арс: Назим, Нуруллагь, Нугзар. Щащар хьунни оьрмулул дус Наташа. Цибанссар, чичру диркIссар учай жула укунсса иширттайн. Яраппий, Оьмардун къубуллумур оьрчIан булуннав, вай тирххандарайн букканнав. Ляхъиндаран ххуйсса бакъа хавар тачIав къабаяннав. Аьпа баннав Оьмардул. Ва паракьат увсса аьрщарал ялув нур дизаннав.
Барзунттайсса авлун
ав тIун багьунни,
Жул дакIурдин утти
угь тIун багьунни:
Уссурвал лавгунни,
чIун къадирнура,
Силул хьусса тIутIив
кьатI шайни кунма.
Цинявппагу ина ххираминнал цIания ссу Оьмарова АтIу
Дардиран увсса уссай
Саэд Мусалаевлул аьпалун
Ссалам, ттул янил чаний,
Ссавруннай чанна цIукуй.
Калам, ттул ятIул мусий,
ЦIарал ранг хъункIултIутIий.
Ссалам гьан буллай бура
Шагьид хьуну лавгсса вийн,
Вил чIарав бацIан буван
Ссавний малаиктурайн.
Ина ниттил ув кьини
Гъан хъанан диркIсса чIумал,
ЧIуллан дикIай хъиннура
Чулу къюву дакIниву.
Алжаннул ххари ивуй,
Заннал хIурулъэн шивуй,
Жун дард дулун лявхъусса
Оьвхъусса дарман уссай!..
Къабавсса хьурдай чара
Къабавсса хьурдай чара
Ва аьсивсса хавар ттун,
Бавсса хьурдай, Минажат,
Вил ххарисса хъяхъаву.
Хъин хьуннин вих ялугьлай,
Аллагьнахь цIими чIа тIий,
Хьхьугу-кьинигу дакIний,
Вищал щугълурдай бивкIра.
Ваксса ккаккан ччай буна,
ЦIими Заннал къабунни,
Вил иминсса ихтилат
«Вацаправу» ливчIунни.
Ваксса ккаккан ччай буна
МукьцIалла шинал дянив,
Къанясив бунна ина
ДакIницIун чIувин буван.
Хъирив хъап-хъаптIи бунни
Вила ххирасса оьрчIру.
Ав-ав, вав-шавтIи бунни
Вила аьзиз уссурссу.
Циван аьсив буккан бав,
Циван дакIру гъагъан дав,
Цан бакIру лахIан дан бав
Вила ххаллилсса арсру!
АрхIал дуклай бивкIми
