Дагъусттаннал агропромышленностьрал комплексрал лябу­ккулун кумагран 2018 шинал личIи дуван ккаккан дурну дур 3 млрд. ва 635 млн. къурушрал. Миннувату федерал бюджетрал­сса дикIантIиссар 2 млрд. ва 635 млн. къурушрал, республикалул­сса – 378 млн.

ХIасан Аьдилов
Дагъусттаннал Минсельхозпродрал бусаврийну, аьмну лавсун, гьашину паччахIлугърал чулухатусса кумаг хьунтIий бур 267 млн. къурушрал, ягу 9,7 процентрал.
ДакIнийн бутанну, дукIу Дагъусттаннай, шяраваллил хозяйствалуву лябукку баву мурадрай, итадаркьуну диркIссар 2 млрд. ва 747 млн. къурушрал, миннувату 2 млрд. ва 300 млн. бивкIссар федерал бюджетравасса.
ДР-лул шяраваллил хозяйствалул ва бакIлахъиялул министерствалул бакIчи Керимхан Аьппасовлул бусаврийн бувну, ДР-лул агропромышленностьрал комплексрал хъунма­сса захIмат бихьлахьиссар респуб­ликалул налогирттал доходру гьарза даврил ххуллий. «2012 шинал АПК-лул циняв даражалул бюджетирттавун дучIан дурну диркIссар 2 млрд. ва 937 млн. къурушрал, 2017 шинал тIурча – 5 млрд. ва 450 млн. Миннувату шяраваллил хозяйствалул бакIлахъиялия – 336 млн., дукиялул ва промышленностьрал переработкалул сурсатирттая – 5 млрд. ва 114 млн., миннуватугу акцизирттах – 3 млрд. ва 41 млн.», — увкунни министрнал.