Декабрьданул 25-нний хьунни МахIачкъалаллал администрациялул бакIчинал 1-ма хъиривчу Аьвдулмуъмин Ибрагьимовлул пресс-конференция. Аь. Ибрагьимовлул бусаврийн бувну, МахIачкъалаллал администрациялийн чIявусса аьрзарду, лабизавуртту дучIайсса дур, аьрщарал участокру дулаврицIун ва ми зузи даврицIун бавхIусса. АьрщарацIун бавхIусса масъалартту яла захIматминнун ккаллину бур. МахIачкъалаллал ялапарлувтал рязи бакъа бур, къатри дансса аьрщарал участок тIалав дурукун, дулунсса аьрщи дакъар тIисса жаваб дуллай бур тIий администрациялул.

ХIасан Аьдилов
«Амма масъалалул захIмат­шиву аьрщи дакъашиву дакъарча, чIяруми аьрщив вана-танал цаллашиврий дацIан дурну дур. Мукунсса цалалуш дур­сса аьрщив къалпсса документирттайну цацIунна цIакьгу дурну, када­стрданул учетрайгу дирхьуну дур», — увкунни Ибрагьимовлул. Мунал мукунма кIицI бунни аьрщарал арардал масъалартталсса буллай ушиву гьашину апрельдания шинай.
«Гьашину жу ашкара барду аьрщарал арардал хIакъиравусса 267 закон лиян даврил иш. Миннувасса 82 материал тIайла ду­ккарду Росреестрданийн ххал дигьин, 44 – судирттайн, 21 материалданул хIакъираву судирттал хIукму хьуссар участокру ма­хъуннай зана дуван», — увкунни администрациялул каялувчинал хъиривчунал.
Аь. Ибрагьимовлул бувсунни къатри дансса аьрщарал участокру инсантуран дулаврил захIматшивурттаяту. Мунал бусаврийн бувну, къатри дансса аьрщив тIалав дуллалиминнал ярглул сияхI гьар шинах гьарза хъанай дур азаллийсса инсантурал. ХIакьинусса кьини сияхIрай бур 10 азаруннаяр ххишаласса инсантал. Микку бур мукунма хIаллихшинну дусса (льготники), мискинсса, каши дакъасса инсанталгу. Мукунми бур 3 азарунния ливчусса.
«Илчилул» вакилнал буллу­сса: «Сайки 200-ксса чIяру зивурдайсса къатри дурну дур ихтияр дакъанна, гьар шинах шагьрулий гьарза хъанай дур ацIрахъул автомойкартту, ихтияр дакъанна. Циванни, щилли ми битлатисса?» тIисса суалданухьхьун: «Ми ма­съалартту ттуйн багьай­сса ба­къар, ттуща къахьунссар миннухьхьун жаваб дулун. Амма суаллу булун багьавай­сса бур», — увкунни мунал.