Щалагу Аьрасатнаву нанисса «Полицейский Дед Мороз» цIанилусса акциялул лагрулий Дагъусттаннал виваллил иширттал министр, полициялул генерал-лейтенант Аьвдурашид МахIаммадов ивунни 1-мур журалул школа-интернатрайн, хьунаавкьунни цIуллу-сагъшиврул ссу­ссукьусса оьрчIащал.

[dropcap]М[/dropcap]инистрнащал бувкIунни министерствалул зузалтрал иширтталсса буллали­сса управлениялул хъунама, виваллил службалул полковник Сахават Сахаватов, МВД-лул Ветерантурал советрал председатель МахIаммад МахIаммадов, МВД-лучIасса Жяматийсса советрал председатель Багьауттин МахIаммадов. Педагогтурал ва тарбиячитурал чIюлу бувну бия школалул жанахIру, классру ва актовый зал цала дурсса игрушкарттал. ЦIусса шинал елкалучIа дуклаки оьрчIал ва учительтурал ккаккан дунни хъамаллуран къав­тIавурттал программа.
Аьвдурашид Ма­хIамма­довлул барча дунни оьр­чIахь ва учительтурахь ЦIусса шин.
— Зул оьрчIру аьчухсса, дакIру тIиртIусса бур. Вагу зул тарбиялул ишри, — увкунни министрнал интернатрал тарбиячитурахь.
Шадлугърал мажлис къуртал хьуну махъ министрнал ва ванащал бувкIминнал интернатрал оьрчIан бахшишру дунни.