Уттигъанну МахIачкъалалив «Камелот» ресторандалуву хьунни Дунияллул халкьуннал дянивсса «Шелковый путь» цIанилусса деловой клуб тIитIлатIисса шадлугърайсса батIаву.Муний гьуртту хьунни Москавлиясса, Санкт-Петербурграясса, Ростовраясса, Ставрополлал крайраясса, Башкирнавасса ва цаймигу кIанттавасса ва Дагъусттаннал хъун шагьрулиясса хъамал – личIи-личIисса касму-сянатирттал, миллатирттал ва оьрмулул шиннал инсантал. БатIаву дачин дурну бия «Прибой» медиа-холдинграл вакил Юлия Диброва.

---

Бадрижамал Аьлиева
[dropcap]М[/dropcap]ахъру лавхъунни жулла республикалийн хасну ва иширавух гьуртту хьун бувкIсса хIурмат бусса хъамаллурал ва «Шелковый путь» клубрал президент, НурмахIаммадлул арс Мямма Мяммаевлул. Ихтилатругу, гьай-гьай, бия ва клубрал давриясса, цIанасса ппурттуву ссаха зий буссарив, гихунмай ссаха зунтIиссарив бусласисса.
Цалва балайрдайну мажлис чIюлу бунни Лариса ХIажиева, МухIсин Камалов хIаласса цIанихсса балайчитурал.

[pullquote]«КьатIаллил аьрххирдаягу мурахас хьуну, ттулла чIун бювхъу­ссаксса ттула угьарасса буттачIан гъанну гьан дуллай ура».[/pullquote]

Ци даву духьурчагу, цалчинсса шаттирду ласлан мудангу захIматри. Ва клубрал гьурттучитурал цала хьхьичI бивхьу­сса масъаларттугу, щаллу буван аьркинмургу ххигу чIявур. Цал­ссарив, дахьра дуллай дайдирхьу­сса давриясса хъун бакъасса ихтилат хьунни жул ванил каялувчи Мямма Мяммаевлущал. Вана жула Дагъусттаннал лайкьсса арснал зуматусса ихтилат:
— 2004 шиналва, нава депутатну усса чIумал, буссия ттул укунсса структура сакин дансса пикри. Амма, личIи-личIисса багьанттайн бувну, хъурмурчIиннив – билаятрай исламрал терроризмрацIун дархIуну хIасул хьусса тагьар сававну, му пикри иширайну щаллу буван къавхьуна. Муния махъгу увкра билаятрал каялувшиндарайн, укунсса, коммерциялуцIун къадархIусса, организация сакин дувансса сиптталущал. Мигу му пикрилуцIун бавкьуну, тIитIарду «Глобус» цIанилусса бизнес-клуб. Мунивух гьурттуну буссия дунияллул мукьцIалва билаятрая­сса ларайсса чиннал вакилтал, паччахIлугърал ишккаккулт, хъуни-хъунисса компанияр­ттал, корпорациярттал бакIчитал. Муния махъгу на хьунаавкьура дунияллул личIи-личIисса билаятирттал лидертуращал, дазул кьатIув ва жула паччахIлугърал хъуншагьрулий. Итабакьлан бивкIссия му клубрал цила журналгу ва мунил лажинтирттай хьхьичIунну ххал бигьлай бу­ссияв паччахIлугъирттал агьам­сса масъалартту. Жул клубрал вакилханартту буссия Американаву, Германнаву ва чIявусса цаймигу билаятирттай.

[pullquote]«ЖучIара язину яданмургу, чийхь сивсуну майшан чинмургу чан дакъассар».[/pullquote]

КутIану бусан, билаятрал хъуншагьрулийсса даврия, кьатIаллил билаятирттайн­сса аьрххирдая мурахас хьуну, шай­ссаксса чIун ттула угьарасса буттачIан гъанну гьан дуллай, цIана хъунмурчIин Дагъусттаннай ура, ва цIуну тIивтIусса клубраха зунсса ниятрай ура.
Клубран цIа хасну «Сунттул ххуллу» тIисса дизарду, жува хъунмурчIин КитайнацIун цачIун хьуну зун най буну тIий. ХIатта клубраву цIанасса чIумал дунияллул 18 билаят бунугу, агьаммур чIурчIав, чул бищаву Китайнайнни дикIантIисса.
Уттинин бувссар гъалгъарду республикалул каялувшиндаращал, хасъсса къуллугъир­ттал бакIчитуращал.
Клубрал хьхьичI бивхьусса, мунил щаллу буллансса масъалартту хъинну чIявуссар, бизнесрал, экономикалул, правалул, кIулшиву дулаврил арардайн, жагьилтуращалсса давурттал ххуллурдайн багьайсса.

[pullquote]«Жул клубраву
18 билаят бунугу, агьаммур чIурчIав, чул бищаву КитайнацIунссар дикIантIисса».[/pullquote]

ХIакьину республикалий хIасул хьусса тагьар дахIалай чинсса дакъар, жуйвасса буржри му даххана дан. Хъинмур чулухуннай тагьар даххана дуван къахьурчагумали, ванияр оькъа­хьунссавагу хIарачат буван аьркинни гьарцаманал. Жулва буттахъал жунна ва хIакьину дусса куннасса республика къакьариртунаха. Ссайн дуккан дитарду жура Совет Союзрай марцIминнувасса ва дурккуминнувасса цаннин ккаллийну диркIсса республика. Жуйра гьарцаннайсса аьйри ва хIакьинусса тагьар хIасул шавугу, цавай – цивппа хIалану, гайми – тинмайгу бавцIуну, кьабивкIун, хъанахъимуних буруглай бивкIун тIий. Жура жула оьрчIан укунсса республика кьаритан къааьркинссар. Жул клуб­рал хьхьичIсса мурадирттава­сса ца агьаммургу – Дагъусттаннайсса тагьар хъин чулий да­ххана дувансса бюхъу-хIарачат бавур.
Жул ният – бизнес бизнес­рацIун дахIлахIавур, бизнесраха зузиминнал ихтиярду дуручлачавур.
Клубравун уххан бюхъан­тIиссар ччинаща – вища, танаща, таманаща, амма къацала суаллу щаллу булланча, жяматралсса, обществалул­сса буллан, яни жул клубрал гьурттучи хьун бюхъантIиссар цува Дагъусттаннал патриотра тIисса, республикалул гьун­ттийсса кьинилул буруккин бу­сса, му кьини чаннасса, хъинсса шаврил цIаний ца чIивисса бунугу захIмат буван хIадурсса инсаннаща. ЖучIара ядуванмургу, цайминнан ккаккан дуванмургу хъинну чIяруссар.
Клуб тIитIлатIисса батIаврий гьуртту хьун бувкIсса хъамал, цамур цичIав ккаккан дуранува, махIаттал-хIайран хьуну бия жулла республикалул халкьуннай, жучIарасса нахIусса дуки-хIачIиялий. Ттун хъинну тIааьнну бикIай уруглан Москавлия ва Аьрасатнал цайми-цайми кIанттурдая махъппур­ттуву жулла республикалийн, нигь-ццах дакъа, Гъунив, Дарбантлив тIий, Сулакьуллал каньондалийн тIий, туристътал заназаврих. Амма жучIавасса хъинмуния буслан анавар ба­къар централ СМИ. Ва тагьаргу ччива даххана дуван.
Ттун пикри бур Дагъус­ттаннал вакилтурал Муданма­сса совет сакин бансса ва мунил бакIчину Ставрополлал крайрайсса Дагъусттаннал вакил Аьбдулла Оьмаров итансса – ххаллилсса чув-адамина, цалва кулпатравуннияр ххишала­сса харжлугъ идеологиялун, жяматийсса давурттан харж дуллалисса.
Данмур чIярур. Бачияра архIал зуннуча Дагъусттаннал бучIантIимунил ххуллий!
ТIайлабацIу баннав, Мяммай! Журив мудангу хIадурссару ина дуллалимуницIун жущава шайссаксса бутIа базин.