Декабрьданул 20-нний МахIачкъалалив хьунни гьашину махъва-махъсса региондалул парламентрал сессия. Муний кIилчинсса буккавруйну кьамул бунни 2018 шинайнсса Дагъусттаннал бюджет.
[dropcap]С[/dropcap]ессиялий хъунмур ихтилат бунни Халкьуннал Мажлисрал Бюджетрал, финансирттал ва налогирттал комитетрал председатель Сайпуллагь Исакьовлул. Мунал бусаврийн бувну, закондалул проектрай аьмсса доход хIисавну дур 100 млрд. ва 540 млн. къурушран. Федерал бюджетравату республикалул бюджетравун дучIантIий дур 4 млрд ва 99 млн. къуруш, бюджетрал дотация хьунтIий дур 1 млрд. ва 161 млн. къуруш, субсидияртту – 2 млрд ва 930 млн. къуруш, цаймигу бюджетирттал дянивсса трансфертру – 6 млн. ва 902 азарда къуруш. Аьмну лавсун федерал бюджетраватусса кумаг хьун тIий бур 75 млрд. ва 229 млн. къуруш. Бюджетраватусса харжлугъру хъанай дур 99 млрд. ва 761 млн. къуруш. Ахирданийгу бюджет дузал хьуну бур 772 млн. къуруш профицитращал, яни харжлугъирттаяр ххишалану.
Сессиялий мува масъалалул хIакъираву ихтилатру бунни ДР-лул ХIукуматрал Председательнал хъиривчу – экономикалул министр Раюттин Юсуповлул ва республикалул финансирттал министрнал кIанайма Юнус Сяъдуевлул.
Сессиялий ххал бивгьунни цаймигу масъалартту.
