Декабрьданул 19-нний Дагъусттаннал БакIчинал кIанайма Владимир Васильев хьунаавкьунни «Федеральная корпорация по развитию малого и среднего предпринимательства («ЧIарамур ва дянивмур даражалул ишбажаранчишиву лядуккан даврил федерал корпорация») тIисса АО-рал гендиректор Александр Браверманнущал.БатIаврий гьуртту хьунни ДР-лул Халкьуннал Мажлисрал Председатель Хизри Шихсяидов, ДР-лул БакIчинал ва ХIукуматрал Администрациялул каялувчи Владимир Иванов, АьФ-лул Ухссавнил Ккавкказуллал иширттал министрнал хъиривчу Ольга Рахуллаева ва цаймигу.
Хьунабакьаврил лагрулий хьунни республикалул 5 инвестициярттал проектирдал презентация. Ми хьхьичIун ларсун дур Корпорациялул ва МСП Банкирал кредитирттал ва гарантиярттал кумаг баву мурадрай.
Владимир Васильевлул бусаврийн бувну, Корпорациялущал хIала-гьурттуну зузаврийну бюхъантIиссар дузрайн буккан буван цаппара захIматсса масъалартту чIиримур ва дянивмур бизнесрайн кабакьаврил бутIуву.
Александр Браверманнул пикрилийну, Дагъусттаннал дур инвестпроектру дузрайн дуккан дувансса цаппара каширду: субъект бусса кIану ва ххуйсса гьавалул шартIру.
Яла хьунни щурущисса инвестпроектирдал презентация. Миннул багьа бур 1,47 млрд. къуруш. ДР-лул Ишбажаранчишиврул ва инвестициярдал агентствалул каялувчи Башир МахIаммадовлул бусаврийн бувну, мивун духлай дур укунсса проектру: «Кизляр Урицкий мясокомбинат» ООО, «Агрофирма «Радуга» ООО, КФХ «Урожай», «Агросоюз» СПоК, Компания «Артман».
Александр Браверманнул бусаврийн бувну, ларай кIицI дурсса цинярда проектру бюхъайссар хъинчулий ккаккан яла гъансса чIумал.
Гара кьини Дагъусттаннал БакIчи Владимир Васильев, ЧIарамур ва дянивмур ишбажаранчишиву лядуккан даврил федерал корпорациялул гендиректор Александр Браверман ва АьФ-лул Ухссавнил Ккавкказуллал иширттал министрнал хъиривчу Ольга Рухуллаева бувкIунни республикалул МФЦ-лийн.
Му идаралул директор ХIусман ХIасбулатовлул хъамал кIул бунни бизнес-центрданул давурттащал. Микку дуллай бур 117 журалул хIаллихшин, миннувух — ишбажаранчишиврул хIакъиравуссагу.
