Вай гьантрай увсса кьини кIицI ларгунни ххаллилсса аьлимчу, медициналул элмурдал доктор, профессор, Ккурккуллал шярава­сса ХIасанов Сайдун ХIамзатлул арснал.

Сайдун ур цала оьрму халкьуннал цIуллу-сагъшиву дуруччаврин хас бувсса, медициналул аралуву чIярусса агьамсса ахттаршиннарду дурсса аьлимчу. Цува пахру-ххара бакъасса ушиврийн бувну, вайксса шиннардий ва хъунасса аьлимчуная кказитрайгу къачивчуну ливчIунни. Увсса кьинилуцIун бавхIуну, ца-кIива махъ учин ччива медициналул тарихраву хьхьичI ххуттайсса аьлим­туравух цала цIа чирчусса ттула шяравучуная.
Сайдуннул мусил медальданий къуртал бувну бур школа. Гара шинал увххун ур Дагъусттаннал медициналул институтравун.
Институт къуртал бувну махъ, ЦIуссалакрал райондалийн тIайла увккун, ца шин тийх дурну дур, яла зун ивкIун ур МахIачкъалаливсса азарханалий. Дагъусттаннал Министртурал советрал ва Москавлив аспирантуралуву дуклан гьан ан маслихIат ккавккун бур. 1956 шинал Сайдуннул лайкьну дурурччуну дур медициналул элмурдал кандидатнал диссертация.
1955 шинал Москавлив ивзун, Москавуллал фармакологиялул лабораториялул каялувчину зий ивкIун ур. 1961 шинал Сайдуннул дурурччуну дур медициналул элмурдал доктор хьунсса диссертация.
Оьттул плазма дуккан дурсса арула аьлимчунавасса ца вагу хъанахъиссар. Му дуккан дурну тIий 1966 шинал ванан арцуйнусса бахшиш дуллуну диркIссар. Му бахшиш цурдагу ванахьхьун лахъа-хъунну дуллуссар А.Косыгиннул.
1969 шинал Сайдун ивкIссар Совет Союзрал эндокринологтурал каялувчину Италиянаву. Ряхра шинай ивкIссар Совет Союзрал чулухасса экспертну ООН-далий. Ва гьуртту хьуссар дунияллул халкьуннал дянивсса хъуннасса агьамшиву дусса эндокринологтурал форумирттай Франциянаву, Англиянаву, Американаву, Чехословакиянаву, Польшанаву, Венгриянаву, Румыниянаву.
ДачIи шинай зий ивкIссар Американаву. Ванал ахттаршиннардан лавайсса кьимат бивщуссар Нью-Йоркуллал медициналул академиялул.
Ванащал гъанну кIул хьусса чIумал, тай махIаттал хьуну бивкIун бур чIивисса миллатрал вакилнал медициналул аралуву дурсса куртIсса ахттаршиннардай, ванал пишакаршиврул даражалий.
Медициналухсса ччаву Сайдуннун буттая дирхьунссар. Ванал ппу ХIамзат 60-хъайсса шиннардий личIи-личIисса аптекардай зий ивкIун ур. Вагу цала даву ххирасса ва ххуйну кIулсса пишакар ивкIун ур.
ЦIана Сайдун пенсиялий ур. Унугу, ванайн цIанагу оьвтIий бур Москавуллал медициналул академиялул студентътуращал ихтилат бан, оьвтIий бур азарханардайн маслихIат ккаккан. Шиккува бусан, Сайдуннул душнил Зулайхатлулгу къуртал бувссар Москавуллал медициналул академия. Ва бур медициналул элмурдал кандидат. ЦIана ва зий бур Москавуллал Ниттил ва оьрчIал центрданий. Зулайхатлул ца душнил къуртал бувну бур Дунияллул халкьуннал дянивсса арардал институт. Зий бур Германнаву. КIилчинмур душнил къуртал бувну бур Москавуллал медициналул академиялул стоматологиялул факультет. ХIасановхъал кулпат щала аьлимтурал кулпат бур. Сайдуннул кулпат ПатIиматгу педагогикалул элмурдал докторди.
Хъунмур оьрму Москавлив лавгун бунугу, Сайдун ур цала Ватангу, миллатгу ххирасса лаккучу. Ва дакIнихтуну ххари шай Лакку билаятрай хъанахъисса цIушиннардая ва дахханашивурттая.
Шяраваллил жяматрал цIа­ния кIирисса ссаламгу тIайла бук­лай, барча тIий бура Сайдун ХIамзатовичлухь увсса кьини. ЧIа тIий буру вингу, вил кулпатрангу цIуллу-цIакьшиву, чIярусса ххаришивуртту.
Андриана Аьбдуллаева