ЦIуллу-сагъшиврул ссуссукьусса инсантурахсса, миннал буруккинттахсса, миннан хьунадакьлакьисса захIматшивурттахсса бургаву, къулагъас ларай даву мурадрай, гьарца шинал декабрьданул 3-нний кIицI лагай Инвалидтурал кьини.
[dropcap]М[/dropcap]у кьинилуцIун дархIусса батIаву хьунни уттигъанну Каспийск шагьрулий «Алмаз» тIисса залданувугу. Му даврил сиптачину бия «ДакIничIансса ххуллу» тIисса цIанилусса автономсса коммерциялул дакъасса организация. Му организациялул директор Аьппас МахIаммадовлул чIа увкунни инвалидтуран цIуллушиву, ссавур, хъинмунийнсса хьул-умуд. Аьркинний мудангу ка-кумаг, чIарав бацIаву дуллансса махъгу буллунни.
Ихтилат бунни «Аьрасатнал ниттихъул» тIисса щалагу Аьрасатнал жяматийсса суккушиндарал региондалул отделениялул председатель Таиса МахIаммадовал. Мунил барчаллагь увкунни цIуллу-сагъшиврул ссуссукьуминнал масъаларттахсса ургъилданухлу.
Махъру лавхъунни чIявусса цайминналгу.
БатIаврил ахирданий цIуллу-сагъшиврул ссуссукьуминнан дуллунни дуки-хIачIиялул наборду.
Каспийскалий шагьрулул ЦБС-лул 2-мур филиалданийгу хьунни Инвалидтурал кьинилун хас дурсса батIаву. Яруннил чаннал жагъалашиврул инвалидтуращал хьунабакьин, бахшиширттащал ва концертрал программалущал, бувкIун бия шагьрулул 2-мур школалул дуклаки оьрчIру.
Укунсса ихIсаниятрал даву 2-мур школалул оьрчIал, хъунмур пионервожатая Лидия Балабаевал каялувшиндаралу, гьарца шинал дувайссар ВОС-рал (Всероссийское общество слепых) Каспийскаллал отделениялий, Инвалидтурал кьинилуцIун дархIуну.
Инвалидтурансса нацIу ссайгъатру лавсун бия «Аьрасатнал ниттихъул» суккушиндарал Региондалул отделениялул председатель Таиса МахIаммадовал.
— Гьарца укунсса хьунабакьаврил жува кувнначIан кув гъан буллалиссару. Жу мудангу ххариссару жулва библиотекарттаву зу хьунабакьлан, – увкунни ванил.
ХIадур бувссар
Бадрижамал Аьлиевал
