[dropcap]Х[/dropcap]авар хьунни, ххярххунни,
ЛарчIунни, канийн ппай тIий,
Азарда жура хьунни,
Арс тIий, хъяй дуна, аьтIий…
М-З. Аминов

[dropcap]В[/dropcap]ай мукъурттицIун дархIусса хъун дакъасса шадлугъ хьунни уттигъанну Николаевлул цIанийсса кучалийсса 2-мур биб­лиотекалий, ноябрьданул махъра-махъсса алхIаткьини кIицI лагайсса Ниттихъал кьинилун хасну. Ваний гьуртту хьунни шагьрулул №37-мур школа-гимназиялул 9-ми кла­ссирттал дуклаки оьрчIру.
Ниттил сиппат язи дургьунур арсурваврал цала оьрмулуву кулпатгу бувайсса, ниттил сиппат дурур­ччунур душвавралгу цала ласкъатлул ужагъ сакин бувайсса. Ниттивур салкьи хьуну дикIайсса хъамитайпалул яла ххуйми, тIааьнми хасиятру. Янусса ва хIалимсса, ххаллил бакъасса ва захIмат ххирасса, дакI хъинсса ва цила лякьлул оьрчIру, гъан-мачча дазу-зума дакъа ххира­сса – вайри цинявгу ниттихъан хасъсса хасиятру» — тIисса нижатраяту байбивхьуна миккусса ихтилат.
Бувсуна вайннал оьрчIахь Алексеевич Светланал «Дяъвилул да­къассар хъамитайпалул сиппат» тIисса луттиравасса дяъвилул шиннардил чIумал хъаннил дурсса чувшивурттаягу, дурхIусса оь кьинирдаягу.
ХIасил, шадлугърал мурад бия ниттихъал, хъаннил кьимат, хIурмат лахъсса бикIан аьркиншиврия бусансса, тикрал бансса.
Бувсуна оьрчIахь ниттил аякьа цирив къакIулсса, ниттил имин­сса иттав буруган хьурдай тIисса цала чIунархIал оьрчIру дунияллий чIявушиву. Ниттихъахамур оьрчIал чулухасса хIурмат-иззат, аякьа, кьимат хъунмасса бикIан аьркиншиву.
НасихIатирттацIун ва их­тилатирттацIун дуруна шикку хъинну оьрчIан дакI даркьусса ххуй-ххуйсса викторинарду ва конкурсругу.
ОьрчIалгу цала чулуха шадлугъ чIюлу дурна С. Есениннул «Ни­ттиясса чагъар», В. Гиннул «Мабари ниттихъан къаччан бикIан», С. Островскийл «Хъанниясса балай», Д. Алешиннул «Барчаллагь, дадай», Р. ХIамзатовлул «Буруччара нинухъру» назмурду пасихIну ва дюхханну дуккаврийну.
Шадлугъ наниссаксса хIаллай цIанихсса балайчитал Т. Гвердцителил «Ниттил яру», И Аллегровал «Дада» ва оьрчIан ххирасса мультфильмравасса «Мамонтрал оьрчIал балай» тIисса балайрдугу лавхъун бия.
Библиотекалул луттирду буккаймур залданувурив «Яла хIалимсса, яла ххирасса!» тIисса цIанилусса луттирдал выставка сакин дурну дия.
Шадлугърал гьурттучитал ва хъамалгу хъинну рязину, дакI даркьуну, гьарца давривух чялишсса гьурттушинна дуллай бия.
З. АьбдурахIманова