[dropcap]Т[/dropcap]Iулдакъашивурттан хху­л­лу кьукьаву мурадрай­сса паччахIлугърал программалул лагрулий Республикалий хьунни «Оружие – выкуп» цIанилусса профилактикалул мероприятие.

[dropcap]О[/dropcap]перациялул мурад бур агьалинал цачIавасса закондалуцIун къабавкьуну ябуллалисса ярагъ, ккулла-янсав ва пIякь учай­сса затру цивппа рязину органнахьхьун дулаву. Гьарица цачIавасса ярагъ хушрай буллусса инсаннан муних буллалиссар багьа. Масала, пистолетрах дулунтIий дур 30 азарда къуруш, автомат­рах – 40 азарда, авчинал ттупанграх – 3 азарда, гранаталух – 1500 къуруш. Ккаккан дурсса сияхIрай бур 25 журалул ярагъ ва пIякь учайсса затру.
Мукьва зурул дянив кIан­тту-кIанттурдайсса полициялул отделлайн буллуну бур 8 автомат, 52 пистолет, 86 ттупанча, 43 граната, мукунна пIякь учай затру ва ккулла-патронну. Агьалинаща ярагъ ласун ДР-лул ХIукуматрал итабавкьуну бур 3 миллион арцул.
Ярагъ булун ччиманаща оьвчин бюхъайссар зучIанма яла гъанмур полициялул отделданийн 02 телефондалийн. Мобильный телефонная оьвтIий бухьурча – 102, 112 номердайн.
ДР-лул МВД-лул Уголов хъирив бизулул управлениялул хъунама МахIаммаднаби Адилхановлул бусласимунийн бувну, агьалинал булун аьркинссар ярагъ хьхьичIва-хьхьичI, цала цивппа мюхчан баву мурадрай.
— ЧIявучин дакIнийссар гьашину ЦIумадиял райондалий хьусса иш.
Дуклаки оьрчIал цанна ляркъусса граната компьютердал залданувун ларсун увкIун, му залдануву пIякь ув­куну ливтIусса ва бивщусса хьуссия, — дакIнийн бутлай ур МахIаммаднаби Адилханов.
Ноябрь зурул 13-нния байбивхьуну 20-ннийн бияннин республикалий мукунна хьу­ссар «Ярагъ» тIисса операция. Операциялул лагрулий органнал дурссар ххал бигьавуртту ва цIухла бишавуртту инсантурал къатраву. Зевххуссар 70 автомат, 20 пистолет, 3 азарда патрон.
КIулну бикIан, федерал закондалийн бувну, за­кондалуцIун къабавкьуну ярагъ ябуллалисса, бахлахи­сса, лавсун заназисса, цайминнахьхьун буллусса, ца кIаная ца кIанайн лавсун увкIсса инсаннан танмихI байссар, 4 шинайн бияннин дуснакь ансса ягу аьчIа дишайссар 80 азарда къурушрайн дияннинсса. Цала хушрай ярагъ органнахьхьун буллусса инсан танмихIрайн кIункIу къаайссар.

ДР-лул МВД-лул пресс-служба
ХIадур бувссар
А. Аьбдуллаевал