[dropcap]Г[/dropcap]ьарцагу хъамитайпалун багьай ичIурасса мюршсса тIааьндакъашивурттащал талан, учиннуча, янналийсса аьгъу­сса ттангъа гьан дуван къашавай, чIирай мюрщи оьрчIал дурсса ттангъран ци банссарив къакIулну. Мукунсса чIумал, ттучанная багьлул ларайсса химиялул сурсатру ласлай, чIунгу, арцугу харж дуллайнияр, ичIура думур ишла дувансса куц кIулну хъинну бикIай.

ЦIу

Гьухъал ттангъри дусса кIанттайн цIил щинавун (щинал ца литIралийн 4 хъунна къуса цIил дичин) щусса ттурлу (губка) щилан аьркинссар чIун-чIумуй, ми ттангъри дакъа хьуннинцIакул. Яла зура шюшайсса куццуй шюшара ми янна.

Фольга

Фольгалияссагу мюнпат ичIува къачIивир. Дукра дуллалийни ишла баву хIисав бакъагумали, ичIура ишла дуллалисса арцул кьай-кьуй цIан къалаганшиврулгума фольга бучIи ля­къайссар. ЧIяруну ишла дуллалисса къусри, гьиссилтту ва цамур арцул кьай-кьуй цIан къалаган, ми дишайсса подставкалул чIанулух тIитIин бара фольга. Байраннай дакъа ишла къадаймургу, дукьаннин, кай-кай дувара фольгалуву.
ЦIан ларгмур чанна даншиврулгу, кIункIурдул чIанулух фольга тIитIин бувну, миву цIан ларгмур дирхьуну, ялун щингу дуртIуну, ца-кIира хъунна къуса цIил дичияра. ДачIи ссятравун зун зулла къусри-гьиссилтту дукъарчIинтIиссар.

* * *
Къуркъа хьусса хIисилу дайл даншиврул кьукьияра муних фольга.

* * *
Дагьанттуй цIансса ттангъри хьуну духьурча, дагьанттул махъмур чулухун лачIун бувара фольга.

Сода

ТIахIни-кIичIу марцI давриву содалияр хъинсса цамур зат дакъашиву кIулсса зат бур, чяй-кофелул цIан лаган дурмуния, кIункIурдая байбивхьуну, ваннайлувусса кафельданийн бияннин.
Му бакъассагу, содалул цивунна хъинну ххуйну ласайссар кьанкьру. Содалущалсса бушкъап дишияра хьхьурайния кIюрххилнин холодильникраву, микроволновкалуву ягу духовкалуву, кьункьаяту цичIар къаличIантIиссар.
Мукунма ччитул лотокравунгу бичияра чан-кьансса сода, миннул хIажатханттувасса тIааьн дакъасса кьанкьру дакъа дантIиссар.
ЦIинцI экьидичин зува чIал хъанай бухьурчагу, цIинцI дусса бад­ралул чIаравгу бишияра сода.

Крахмал

ЧIавахьулттив шюшлашийни ишла дуллалисса щинавун чан-кьансса крахмал бичирчан, чIавахьулттив пперха тIий марцI хьунтIиссар.

Аспирин

Янналий дезодорантрая хьу­сса ттангъри марцI дуван кумаг хьунтIиссар щинал 100 мл. ба­ссан бувсса аспириндалул 2 гургалийну.

НакI

Бартбисулий хьусса щекьирал ттангъри бигьану марцI дуван бюхъантIиссар кIирисса накIливун щусса щеткалул кумаграйну.

Лимондалул кислатIа

ТIахIни-кIичIу лишайсса салфеткартту ххуйну марцI хьунтIиссар, шюшлан хьхьичI ми цаппарасса хIаллай лимондалул кислатIа дассан дурсса щинаву аьраян дитарча.

Косметикалул сурсат

ЧIирайн лачIун бувсса ча­гъардай (обои) чIиви оьрчIал фломастерданух чивчумур ли­ххан буван бюхъантIиссар лажиндарая косметика дукьан ишла дувайсса двухфазный сурсатрайну (хъаннива чIявучин кIулссар ва цирив).

Ккарччив шюшай порошок

Янналий хьусса аьгъу­сса ттангъа гьан дуван кумаг хьунтIиссар ккарччив шюшайсса порошокрая. Мукун­сса кIанттайн, ухчIинчул, хьхьувайния кIюрххилнин бичияра порошок, кIюрххилнин ттангъа дакъа хьунтIиссар. Агар цал кумаг къахьурча, кIилчингу мукунна дувара.
Аьгъусса ттангъращал­сса талатавриву мукунма кумаг бувантIиссар тIахIни-кIичIу шюшайни ишла дувайсса «Ферилулгу».

ХIадур бувссар
Бадрижамал Аьлиевал