[dropcap]С[/dropcap]иражуттин ва Мариян дуклай бивкIссар университетраву архIал: Сиражуттин – строительный факультетрай, Мариян – филологиялул факультетрай. Гикку кIулгу хьу­ссар цаннащал ца.Жун кIулссия миннал дусшиврия. Дуккаву къуртал дайхту, хъатIи бувссар Чи­ттурув, ГьунчIукьатIату жалин дурцуну. КIивагу чул хъинну рязину.
[dropcap]Ж[/dropcap]ул къатлувун Мариян був­ххуна жул арилчинмур ссу­ну, чIивимур ссийщал кунма оьрмугу бувтссар жу мунищал. Жу буссияв 6 ссу, 3 уссу. Нитти-буттангу хъинну ххирану бикIайва Мариян. Яла ми Нугъайнавун зун лавгуна. ОьрчIру хьуна. Гьарца ду­ккаврил шин къуртал хьуну, цуппа каникуллайн буккайхту, оьрчIругу бувцуну, нитти-буттачIан Читтурув бучIайва. Жугу ялугьлай бикIайссияв ххарину, оьрчIругу, Мариянгу бучIаннин. Ттун дакIний ба­къар тачIав жула кулпатраву цаннал цаннан якьама хьунсса зат бувну. Гьарца даймур-дитаймур маслихIатрай, бавкьуну дай­ссия. Марияннун ичIаллил багьу-бизу ххуйну кIула. Хъунаманан ххуллугу, чIивиманан хIурматгу бан кIула, цила буттал къатлуву ниттил лахьхьин бувну. Оьр­мурдал бугьарасса нину-ппугу, жух, оьрчIах, буруглай, ххарину бикIайва. Ттун тачIав дакIний бакъар Сиражуттин Марияннущал лахъну гъалгъа тIий, ичIува ссибивзун. Цивппа бигьалаган нанийни, оьрчIру ттучIава кьабитайссия.
Так ттуща «Дараччи» клубравух хIала буххан къавхьуна, зузийни, ттул даврий хъунна­сса хъар дия.
ТачIав бакIравунмагу къабуххайва Мариян къашавай хьунссар тIисса пикри – мунил бувтсса оьрмугу, мунил жан ва гужгу чIалай. Цибави утти, Алжаннул ххари баннав! Чурх кIукIлуний, рухI бигьаний дишиннав! Амин.

Пазилат МахIаммадова