[dropcap]Н[/dropcap]оябрьданул 21-нний Дагъусттаннайн къуллугърал аьрххилий увкIсса АьФ-лул Президентнал СКФО-райсса вакил Олег Белавенцев ва ДР-лул БакIчинал кIанайма Владимир Васильев бивунни Къизлардал хъунмур азарханалийн. Тикку хъамаллурал ихтилат бунни азарханалул зузалтращал ва хъин хъанахъиминнащал. Полпреднал зузалтрахь цIувххунни миннал циксса харжру ласайсса бурив, кIул бунни ми АьФ-лул Президентнал «майрал хIукмурдай» ккаккан бувминнуцIун бавкьуну бурив ягу бакъарив.

[dropcap]А[/dropcap]зарханалул хъунама хIакин Ибрагьим Аьлиевлул бусаврийн бувну, медициналул зузалтрал харжру аьркинссаксса ххи бувну бур, миннул ялун дулайсса дур стимулданул арцугу. Хирургиялул бутIуй уттубивхьуминнал бувсунни дарурттал ва цаймигу аьрки-къарциндалул дузалну бушиву, дукиялия рязину бушиву ва азарханалий къашайшалтран аьркинсса цинярда шартIру дузал дурну душиву.
Ибрагьим Аьлиевлул кIицI бунни азарханалий хIакинтал биялну бакъашиву.
Гара кьини Олег Белавенцев ва Владимир Васильев бивунни «Концерн «КЭМЗ» ОАО-лийн, мунил гендиректор Ибрагьим АхIмадовлущал цачIу хъамал кIул хьунни заводрал цехирдаву дуккан дуллалимунищал, хаснува чIиримур авиациялул самолетру дуккан даврил иширттащал. Полпреднан ва региондалул каялувчинан ккаккан дунни самолет МАИ-411. Мунил проект дурну дур Москавуллал авиациялул институтрал КБ-лул.
О. Белавенцевлул ва В. Васильевлул хъунмасса кьимат бивщунни му самолет дуккан даврин.
Яла бусравсса хъамал бивунни Къизлардал коньякру дуккан дай заводрайн ва Къизлардал «Дарман» тIисса агрокомплексрайн.