[dropcap]Н[/dropcap]оябрь зурул 9-нний Республикалул Национал библиотекалий хьунни «ТIайлабацIулул территория» тIисса, жагьил­сса пишакартал давурттал дузал баву мурадрайсса, ярмарка. jammilМунил сакиншинначиталну хьунни ДР-лул ЗахIматрал ва социал хьхьичIуннайшиврул министерствалул «Успех» тIисса центр.

И. Саидова
[dropcap]Ш[/dropcap]икку гьуртту хьунни ДР-лул захIматрал ва социал хьхьичIуннайшиврул министрнал бигарду чIумуйну би­ттур буллалисса Расул Ибрагьимов, Республикалул жагьилтурал иширттал министерствалул, кьай-кьуй итадакьлакьисса предприятиярттал ва кIулшивуртту дулаврил идарарттал вакилтал. Мукунма ярмаркалул даврий гьурттушинна дан бувкIун бия «Гильдия строителей СКФО» СРО-лул Ассоциациялул президент Аьли Шяъбанов ва вара гильдиялул директор Запир Акаев.
Ярмаркалийн бувкIун бия 200-нния ливчусса республикалул ВУЗ-ирдал студентътал. Вайннавух бия «Успех» центрданийн давурттал дузал бара тIий хьхьичIава аьрзри буллуну бивкIсса жагьилталгу. Ши­кку жагьилтураща бюхълай бия, цанма зун ччисса компаниярттая кIул бувну, даврийн кьамул баву тIалав буллалисса анкетар­тту дуцIин дан.
Расул Ибрагьимовлул цала ихтилатраву кIицI лавгунни, гьашину июль зуруй хьусса ярмаркалул хIасиллайн бувну, 100 жагьилсса пишакар давурттал щаллу увшиву.
Ярмаркалул гьурттучитал барча буллалисса ихтилат бунни Аьли Шяъбановлулгу. Ванал бувсунни ва Ассоциациялувун 450 строительствалул идара бухлай бушиву.
— ЧIявуми идарартту мюхтажну бур ларайсса квалификация дусса пишакартурах ва строительствалул даву кIулсса зузалтрах. Ассоциациялувунсса кадрардугу кьамул байссар хъинну хъирив лавну. Зущагу бюхъай­ссар Строительствалул гильдиялувун кьамул бара тIисса аьрзри булун. Му бакъа­ссагу, жу кумаг байссар аьркин­сса пиша язи бугьан ва ми пишакартал гильдиялул биялдарайсса кIулшивуртту дулаврил идарарттай хIадур бан. Республикалул строительствалул комплексран аьркинну бур ларайсса квалификация дусса кадрарду. Гильдиялул гьашину кIилчинсса шинни Worldskills Russia республикалул чемпионат­рал даву сакин давривух хIала хьуну. Гихунмайгу пикрилий буру, гьашину гъинттул Республикалул ЗахIматрал ва социал хьхьичIуннайшиврул министерствалущал дур­сса кьутIилийн бувну, хIала-гьурттуну зун, — увкунни Аьли Шяъбановлул.
«Успех» центрданул директор Шамил МахIаммадовлул кIицI лавгунни вакансиярттал ярмаркартту мукьва зуруй цал дайшиву.
— Центрданий жу гьарица кьини кьамул байссар даврил щаллу бара тIий бувкIсса жагьилтал. Даврил хъирив бувкIминнан тIурча, ччай бур яла хьхьичIунми пишардай зун. ЖучIан чIявусса аьрзри бучIай юристнал, экономистнал пишалий зун ччисса жагьилтурая. ХIакьину захIматрал рынокрай цайми пишарду бур тIалавну. Мунияту жун багьай гьарица жучIана увкIсса пишакарнащал хасъсса маслихIатру ккаклан, — увкунни Ш. МахIаммадовлул. Ванал бувсунни жула респуб­ликалийгу, Аьрасатнавугу хьу­сса захIматрал пишарду машгьур баврил чемпионатрал давриягу.
Ярмаркалул даврил лагрулий «Финанс-групп» АНО ДО-лул директор Жамиля Мелесовал хъамаллуран ккаккан дунни агьали давурттал дузал буллалиминнансса мюнпатсса маслихIатру бусса тренинг.
Ярмаркалий гьурттушинна дурсса компаниярттал вакилтуран дуллунни барчаллагьрал грамотартту.