Ларгсса нюжмаркьини Апанни Къапиевлул цIанийсса Лакрал драмалул ва музыкалул театрданул тIиртIунни 82-мур сезон. Театрданул коллективгу, тамашачиталгу барча бан бувкIун бияДагъусттаннал театрал иш­ккаккултрал союзрал хъунама, Аьрасатнал халкьуннал артист Айгум Айгумов, Яруссаннал театрданул директор МахIаммадрасул МахIаммадрасулов ва режиссер Аьлисултан Батиров.

[dropcap]Т[/dropcap]еатрданул каялувчи Бадрижат МахIаммадхIажиевал ва хъунама режиссер Аслан МахIаммадовлул бувсунни ларгсса сезондалул хIасиллая ва цIусса сезондалий хьхьичI бихьлахьисса мурадирттая. «Бивхьуну бур ххюва премьера: «Ккурккуллал Щаза», «Гъази-Гъумучиял серенада», «ЧIаххуврачIан хъамалу», «Провинциал кIанттул анекдотру» ва «Хъявринсса ччаву». «Воспевший Дагестан» фестивальданий «Ккурккуллал Щаза» спектакль лайкь хьуссар цалчинмур кIанттун. Лайкьсса даражалий дурссар Лак­рал театрданул тарихраву хъунна­сса аьш кьадиртсса каялувчи ва режиссер Валерий Эфендиевлул, лакрал шаэр Бадави Рамазановлул юбилейрдан хас дурсса аьпалул вечерду, дуклаки оьрчIал дянивсса лакку мазрайсса шеърирду дакIних буккаврил конкурс «Щаращи». ТIайлабацIулущал хьуссар лакрал щархъавунсса гастроллу. Ттигъанну кувнначIан кувннал гастроллу хьуссар Астраханнал драмалул театрданущал.
Ва зурул 22-нний гьуртту хъанахъиссар Ухссавнил АьсатIиннал хъуншагьрулий хъанахъи­сса «СахIналул дазу дакъассар» цIа­нилусса халкьуннал дянивсса миллатирттал театрдал фестивальданий, «Малла Насруттин» спектакльданущал.
Вайннал барчаллагь увкунни лакрал тамашачитурахь чIарав бушиврухлу.
Айгум Айгумовлул, театрданул коллектив ва тамашачитал барча буллай, кIицI лавгуна Дагъусттаннал театрдал дянив Лакрал театр хьхьичIунсса кIанттай бушиву.
ТIиртIунни сезон Бадави Рамазанов дунияллийн увккун 100 шин там шаврил юбилейран хас бувну бивхьусса ванал «Хъявринсса ччаву» пьесалиясса спектакльданийну. Мунил премьера хьуссия гъин­ттул Ваччав.
Спектакльдания бусанну хъиривмур номерданий.