[dropcap]В[/dropcap]ай гьантрай Дагъусттаннал хIукуматрал председательнал хъиривчунан кIанайсса Рамазан ЖахIпаров, Республикалул БакIчи Владимир Васильевлул тапшур бувну, ивунни «Виадук» тIисса таможнялул ва логистикалул терминалданийн ва МахIарамккантуллал таможнялул пострайн. Ванащал бия Ухссавнил Ккавкказуллал таможнялул управлениялул хъунама Константин Муруев, Дагъусттаннал таможнялул хъунама Руслан ЯхIияев ва мунал цалчинма хъиривчу ХIажирамазан Исламов.

А. Аьбдуллаева
ДакIнийн бутан, хьхьичIва цаппарасса СМИ-рдай, Дагъус­ттаннал ва Азирбижаннал дальнобойщиктурал бусласимунийн бувну, чивчуну буссия «Яраг-Казмаляр» пропускной пункт­райсса захIматшивурттая. Рамазан ЖахIпаровлул тIисса ку­ццуй, ва пострай захIматсса тагьар хIасул къахьуншиврул, кьай ларсун нанисса машинартту хъунмасса хIаллай бацIан къабуллан­сса чаран лякъин аьркинну бур. Ми машинартту чIявуми ларсун най бур ччяни зия шайсса дуки-хIачIия.
— Сезондалул чIумал «Яраг-Казмаляр» пунктрайх кьайлущал нанисса машинартту гьарза хьурчагу, очередру лахъи къалагансса чаран ляхълахъиссар. Аьрасатнал аьрщарайн гьантлун 150 хъуни машинартту итабакьин бюхъайсса даражалул бур пропускной пункт «Яраг-Казмаляр», амма ноябрь зурул 3-нний ва пунктрайх итабавкьуну бур 192 машина, – тIий ур Рамазан ЖахIпаров. Таможнялул участокирттал ялтту бувккун махъ, ххал бигьавурттал хIасиллу дуллай, Рамазан ЖахIпаровлул увкунни:
«Таможнялул зузалтраща нех дирхьуну нанисса машинартту, ччяни ххалгу бувну, итабакьин бюхълай бур. Агана цайми къуллугъирттал, арцу цIиккин ччай, искусственнайну очерду хьун дулларча, минналсса бан аьркинни цайми органнал».