Уттигъанну МахIачкъалалив хьунни аслийсса ва уттизаманнул модалул «Этнополис» тIисса цIанилусса фестиваль.

Бадрижамал Аьлиева
[dropcap]М[/dropcap]унивух гьуртту хьунни дизайнертал, модельертал, ми пишарду лахьлай, му аралуву дук­лакисса жагьилтал ва миннал преподавательтал. Фестивальданул агьаммур мурадгу бия Да­гъусттаннал халкьуннал миллатирттал аьдатру материал культуралийхчин – ва ишираву – миллатирттал аслийсса ва уттизаманнул яннардайхчин – машгьур даву.
Фестиваль тIитIлатIисса ихтилат бунни ДР-лул миллатрал политикалул министрнал хъиривчу Арсен МахIмудовлул. Ванал дакIнийн бувтунни фестиваль жулла республикалий кIилчин дуллай бушиву. Бувсунни фестивальданиясса хъин чулийсса пикрирду чIяву хьуну най бушиву ва миллатрал модалухсса бургаву цалнияр цал ларай хъанай душиву, мунилгу чIалачIи буллалишиву инсантурал хIарачат цалва мархри, цалва багьу-бизу буруччин, хъамакъабитан. КIицI лавгунни республикалул халкьуннал тарихийсса мархри ва аьдатру дуруччаврийн тIайла дурсса цумур-цагу проектрал чIарав бацIан ДР-лул Миллатрал политикалул министерство хIадурну бушиву.
Фестивальданий цалва коллекцияртту ккаккан бунни цIа дурксса ва дахьва цалчинсса шаттирду ласласисса дизайнертурал ва модельертурал. Миннул лях-карах балайрду тIий бия цIа дурксса артистътал.
Ахирданий сахIналийн цалва коллекциялущал увккунни цIанихсса модельер Щамхал Аьлиханов. Мунал барчаллагь увкунни ва проектрал сакиншинначитурахь ва гьурттучитурахь.
— «Этнополис» – му жагьил­сса проект хъанай дур, жагьилшиврух къабурувгун, мунил Дагъусттаннансса агьамшивугу хъуннасса дур. Жунма чара бакъа аьркинссар жулла авадансса культура хьхьичIуннай дуллан. Жунма жулва мархрая пахру бикIан аьркинссар, — увкунни Щ. Аьлихановлул.
Фестивальданувух гьуртту хьусса цинявппагу лайкь хьунни сакиншинначитурал чулуха­сса дипломирттан ва барчаллагьрал чагъардан.