ЦIуссалакрал райондалийсса школарттай мудангу дуллай бур оьрчIру итххяххан баву мурадрайсса личIи-личIисса мероприятияртту.
И. Саидова
[dropcap]О[/dropcap]ктябрьданул 19-нний ЦIуминалийсса ТIюхчардал 1-мур школалий хьунни «Роль и значение школьных библиотек в жизни детей» тIисса цIанилусса конференция. Му сакин бувну бия школалул библиотекарь Халункачар Апанниевал.
Гьуртту хьунни шикку ЦIуссалакрал райондалул КIулшивуртту дулаврил управлениялул методист М. Шагьмандарова, управлениялул хьхьичIунсса пишакар И. Мажидова.
Конференциялул давриву гьуртту хьунни мукунма школалул циняв классирттал дуклаки оьрчIругу.
ОьрчIал оьрмулуву луттирдал бугьлагьисса агьамсса кIанттурдаясса ихтилат бунни Халункачар Ясупиевнал, бувсунни библиотекалуву дуклаки оьрчIащал дуван пикрилийсса давурттая.
Мисиду Шагьмандаровал цила ихтилатраву кIицI лавгунни луттирду оьрчIал оьрмулул дустал бушиву, интернетрал ва цаймигу цIушиннардил луттирдал кIану тачIавгу къабугьантIишиву, луттирду ккалансса хIарачат буллан аьркиншиву.
Ихтилатру бунни хъуними классирттал дуклаки оьрчIал: Альбина Кьурбановал, ПатIима ХIаммадовал ва Руслан Кьурбановлул.
Конференциялул даврил хIасиллу дуллай, Халункачар Ясупиевнал нитти-буттахь ва учительтурахь миннат бунни оьрчIру луттирду ххирану тарбия буван хIарачат буллалияра куну.
