«Аьрасат – ттул тарих» музейрал комплекс тIивтIусса октябрьданул 19-нния 22-ннин шивун 20 азаруннийн бивсса тамашачитал бувкIун бур, вай гьантрай гьарнахь шивун уква буххансса ихтияр диркIссар.
З. АьбдурахIманова
[dropcap]Х[/dropcap]ьхьичIва бувсъсса куццуй, тарихрал паркрал лагру 13 азарда кв.м. дур. Вайннува 1000 кв.м. итадаркьуну дур «Рюриковичи», «Романовы», «От великих потрясений к Великой Победе. 1941-1945», «Россия – моя история. 1945 по настоящее время» тIисса экспозициярттал заллан. Билаятрал аьмсса тарих ккаккан бувсса вай павильоннаву жулламур республикалул тарихрал цаппара кIанттурдугу буссар.
Музейраву мукунма буссар «Ттул Дагъусттан» тIисса, хъунмасса тарих ккаккан бувсса, жунмалусса павильонгу. Му щаллу бувантIиссар декабрьданул 20-ннин.
ЦIана музейравунсса билетрал багьри ххал бигьлагьисса даву най дуссар. Ва нюжмардий баян бантIиссар мивунсса билетрал багьагу.
Тарихрал паркрал хъунама МахIти Рамазановлул бусаврийну, пикрилий бусса бур хьхьичIунмай хIукуматрал хасъсса программа кьамул давриха зун. МунихчIин музейравун хасъсса кьинирдай букIлан бюхъантIиссар Дагъусттаннал вузирдал, ссузирдал студентътураща ва дуклаки оьрчIаща. Мукунма пикрилий бур ахIвал-хIал кIюласса кулпатирттавасса, оьрчIал къатравасса, интернатирттавасса оьрчIансса украсса акцияртту дуллангу.
Тарихрал парк зунтIиссар, итникьини личIаннин, гьар кьини кIюрххил ссят 10-нния ахттакьун бизулул ссят 20.00 хьуннин.
