Туризмалул кьинилун хасну
[dropcap]Л[/dropcap]аргсса нюжмаркьини Лакрал райондалийн бувкIун бия чIаххувсса Ахъушиял райондалул бакIчинал хъиривчу Эльвира ХIасанхIусайнова, терроризмалийн къаршисса отделданул каялувчи Алдам Алдамов ва музейрал хъунмур Зубайрижат Мирзаева, кIирагу райондалул цачIуну туризм хьхьичIуннай дансса суаллу ххал бигьинсса мурадрай.
[dropcap]Х[/dropcap]ъамал бивуна Гъумучиял Хъун-мизитравун, Совет Союзрал Виричу Муса Маннаровлул цIанийсса музейравун ва цаймигу тарихийсса кIанттурдайн. Муния махъ райондалул администрациялул бакIчинал хъиривчу Абакар Къюннуев, Ансар Къажлаев, Жагьилтуращалсса иширттал, туризмалул ва спортрал комитетрал каялувчи Малик ХIусманов хъамаллуращал лавгуна Буршайн, кIикку жагьилсса кулпатрал тIивтIусса хъун бакъасса турбаза ххал бан.
Цаппарасса шиннардил хьхьичI на чивчуссия Буршай МахIаммада МахIаммадовлул дурсса балугъирттал хозяйствалия ва Ххюлусмавсса дурцIу дикIуха зузисса хъун бакъасса цехрая. БуттацIун хъар ларсун, зий ия ванал арс Арсенгу. На махIаттал хьуну буссияв жагьилтал шяраваллава лихъа буклакисса чIумал лакрал щархъаву ца яла архсса, гьан-бучIан захIматсса Буршиял шяраваллия мадара архсса кIанттай оьллал фермагу дурну, кIиккун чани ва щингу дурцуну, аьркинсса шартIругу дузал дурну, хъинну гъирарай зий ккавккукун. Лапва хIайран хьунав, лавайсса дуккаврил идарагу къуртал бувну, Ххюлуссуннал школалий дарсру дихьлахьисса ванал кулпат Залинагу, даврия тархъан шайхту, гьарца кьини ласнан кумаг бан лагайсса бушиву кIул хьувкун. Вайннал мюрщисса оьрчIрува бия вардишну нитти-буттан кумаг буллай. КIани мукIру хьунав на зун ччисса инсан я шартIирдая, я захIматрая нигьакъаусайшиврийн. Жагьилсса лас-щарнин дакIний-мазрайвагу бакъая шагьрулийнмай бизан.
Вана хIакьину вайннал райондалийн туристал кIункIу буллай. Лажин кIялану хьунабавкьунни чIаххувсса райондалия бувкIсса хъамалгу.
«ЦIубутIуй жу шикку бувссия, жула дустал хьунабакьлан, ца чIивисса къатта, — буслай бур Арсен ва Залина. – Дягъинттул ПпабакIуйн лахъан букIлакIисса туристалгу шиная-шинайн чIяву хъанан бивкIукун, пикри хьуна гьарца аьркинсса шартIирдал дузалсса хъамал кьамул бай къатта бан. Барду 7 кв. ссятрай харж байсса чIивисса ГЭС, къатта бувну махъ барду парная, бакьин барду бяр, ласарду гиву бигьлансса къаехъру.
Бувну къуртал бавай буру гьарта-гьарзасса кафе. Дуссар сакин дурсса бизнес-план. Дан дакIнийсса давуртту уттигу чIярусса дур. ОьрчIругу хъуни хъанай, вайннаягу кумаг бикIанссар».
МахIаммадовхъал кулпатрал щалла гъи турбазалий гьан дайсса дур. Ссуттихунмай бучIайсса бур шаппай Ххюлусмав, ризкьи-кьини лакьин Буршайн цала тIювайнгу лаглай.
«Арсен буттал кIану ххирасса, чIивинияцIа ризкьилуха зий вардиш хьуну, захIматрал увгьусса жагьил ур. Ванан хъунмасса тIайлабацIу хьуссар кулпат цала дакIничIангу, пикрирдачIангу, иширттачIангу гъансса бакIрайн багьаву, — тIий ур шагьрулия игьалаган увкIсса Оьмар Мусаев. – Бигьалаган бувкIсса инсантуран зунттаву аьркинсса гьарца шартIру дузалну дуссар вайнначIа. Зунттавух сайрданий гьан, авлий буккан ччиминнахьхьун булайссар дучри. ТIабиаьтрай хьхьу рутан ччиминнахьхьун булайссар «спальный мешокру».
Ссупралухсса ихтилатругу бия хъун хъанахъисса ник ватан ххирану тарбия дан, миллатрал магьирлугърал ирс ябан, туризм хьхьичIуннай дан кIирагу районнал цачIуну чаранну лякъаврия ва дуклаки оьрчIал дянив дусшиву цIакь даншиврул, совет заманнай кунма, чIаххувсса районнайн хъамалу буцлай, цачIусса мероприятияртту даврия.
Хъамал рязину ливчIунни хъамалушиндараягу, ккавкмуниягу. КIицI лаглай бия туризм хьхьичIуннай дансса шартIру жучIарагу кьатIаллил билаятирттайнияр къаоьккисса душиву. Гайннахь дия цала хIадур дурсса турист маршрутрал план. Мугу ххал диргьуну, Лакрал райондалул администрациялул каялувчитурал бувсунни чIал къавхьуну цалагу хIадур дан дакIний бушиву укуннасса план, гихунмай уртакьну зий байбишиншиврул.
Зулайхат Тахакьаева