[dropcap]МахIаммадлул арс
ХIасан-ХIусайн Абуев[/dropcap]

Полковник. ДР-лийсса Кьиблалул федерал округрал хъунама федерал инспектор. ЛичIи-личIисса шиннардий зий ивкIссар: Аьрасатнал Федерациялул Президентнал полпреднал маслихIатчину, Аьрасатнал Федерациялул Президентнал Дагъусттаннайсса вакилнал къуллугъру биттур буллалиману. 2013-ку шиная шинай зий уссар Дагъусттаннал Культуралул, традициярттал ва мазурдил жяматийсса фондрал председательну.
Увссар 1947-кусса шинал ДАССР-данул Министртурал совет­рал председательнал 1-ма хъиривчу МахIаммад Абуевлул, щалагу республикалийх цIа дурксса буттал, къушлий.
1Цукунсса хьуна оьрчIний вийнма яла гужсса асар биян бувсса зат, иш?
ТачIав хъамакъаритай Ма­хIач­­къалалив Лениннул майданнив майрал 9-нний цалчин ккарксса Ххувшаврил парад. Му чIумал ттун духьунссия 6-7 шин.
2Цими никирайн дияннинсса кIулли вин вила ппухълуннал нясав? Буси яла архманал цIа.
Никру цинярдагу ккалай къаивкIра, амма кIулли жула нясаврал дайдихьу дурсса инсанну хьушиву Шамлиясса (Сириянавасса) Абу-Оьмар тIисса инсан. Мичча нанисса духьунссар жул фамилиягу.
3 Инсаннал хасиятраву винна яла ккарккун къаччимур лишан?
Буллусса мукъул заллушиву дан къашаву, вихшала дишин къашайсса ушиву.
4Вила оьрмулуву яла алши ба­къамур шин?
Цаппара хIисаврттайн бувну, мукунсса шинан ккаллину духьунссар тIий ура 1969-ку шин.
5Яла алши бумур шин?
Щарсса дурцусса шин – 1972.
6 ВичIара циксса арцу хьувкун, дигьаларгун дикIанссия вил дакI?
Ттул талихI арцуцIун бавхIу­ну бакъассар.
7Инсаннал тахсирдавасса цумур тахсир хьунссия вища бигьану багъишла битан?
Хъун бакъасса арцуйну­сса бурж.
8Бувагу къабитан?
Лавмартшиву.
9Ссан диял къашай вил чIун?
Сагъну-саламатну (къашавай акъа) оьрму бутлансса чIун.
10 Бартлавгун ччисса вила шанма мурад?
Ттунма ххирасса инсантал хъунмасса хIаллай талихIрай, тирххандарай яшаву.
11 Вила оьрмулуву хъинну ххирасса кIантту бувгьу­сса шама инсаннал цIа?
МахIаммад, Муслимат, ХIа­жиатта.
12 Винма ххуй бизайсса хъамитайпалул сурат?
Цинявппагу душурвараву ляличIинува ххуйну чIалачIисса душ на ттунма щарнугу бувцу­ссия.
13 Вина кьамулсса чув адаминал сурат?
ОьрчIния шинайва ттун къакIулли ттула буттаха лащан ан хьунсса цама инсан.
14 Агарда бюхъайсса бивкI­ссания, инава ци кIанттай, ци чIумал увну ва ци билаятрай яхъанай ччива вин?
Нава увсса, хъуна хьусса ва яхъанахъисса кIанттай.
15 Ссаяту бикIай вил яла хъун­мур пахру?
Нава дувадахънугу, лажинлякъунугу хъуна къавхьуну ушивриясса.
16 Цукунсса дур вил виятурасса къарязишиву?
ЦIуллуну акъашиву.
17 Яла ххирамур дукра?
Ччан бикIай бурув­ссаннувух бявххусса вивра.
18 Яла къаххирамур дукра?
Дагъ бувсса калан.
19 Ссаятусса бикIай яла хъунмамур хIучI?
Къашайния так дяъвирду.
20 Хьуссарив вил оьрмулуву винна инара ттинин багъишла ритан къахъанахъи­сса къел?
Юх, къархьуссар.
21 Лавгсса заманардавасса цIа­них­сса инсантурава­сса цуманащал хьунаакьин ччива вин?
Ччива ихтилат бан Чулахъ-Сурхай-ханнащал, имам Шамиллущал ва Сталиннущал.
22 Цукунсса бур, вил пикрилий, лакрал миллатрал яла хъунмур буруккин, цукунсса бур мунил ялун бучIантIимур?
Дагъусттаннал бивтсса тарихрал чIалачIи буллай бур ххуй-хъинмур мудангу хъар хъанай бивкIшиву аькьлулул бувччу­сса, дакI уздансса инсантурайн ва миннал бартбигьлай бивкIмунийн. ХIакьинурив тIурча, чIявуминнал хIарачат бур, миллатрал буруккин буллалимигу хъанай, так цанна оьр­мулул карьера дувансса. Аьркинну ур хIакьсса лидер. Му чIумал бучIиссар гъалгъа тIун ялун бучIантIимуния.
23 Ци дахчилай дур хIакьину Да­гъусттаннахун, цил аьнтIи­кIасса кIанттун ва надирсса миллатирттан лавхьхьуну, ххуйнугу, ххаллилнугу ялапар хъананшиврул?
Хъуни-хъунисса къуллугъир­ттай тIулул къамарцIсса, ка щяхсса инсантал чIявусса бушиву.