[dropcap]З[/dropcap]узияра, уссурвал, ссурвал!

Ккуллал райондалийсса август зурул дязаннал гьантри. Учин му­къун, Лаккуй уртту-щин чагъиравусса ца чIун къадикIайча, сайки мукьва барз бикIай: июнь-сентябрь.

Вай зурдардилгу цанна лархьхьусса чIюлушивуртту, караматшивуртту, тIабиаьтрах ябивтнал дакI асардал дуцIин дуллалисса ххуйшивуртту хIасул дуллан дикIай.

Жула зунттавусса инсантурал бакI­лахъия ласайсса хъуру къадугьлай душиврия буслайнма бур ва яру бунан му чIалайгу бур мукун бушиву. Ва иширацIун бавхIуну ший яхъанахъисса инсантурал биччибакъулшиву дуллалаврицIун, хIукуматрал чулухасса «компаниярттугу» дуллай бакъар. Жула инсан чIярусса аьсрурдал лахъишиврий каялувшиврулу зий аьдат хьусса инсан ур. Мунияту, цIана хIукуматрал чулуха цакьнинияр ихтиярду ххисса духьурчагу, дакI тирх учин дурну, инсан уттигу зий ­акъар. Зунттаву яхъа­нахъисса инсантурал дуланмагъ чIяруми дур ятту-гъаттара ябаврил чулухасса.
Цалнияр-цал гьаз хъанахъисса дуламанттайх най бур Ккуллал райондалул Хъуннеххал зуманийх бивхьу­сса кьиблалул чулийнмай нани­сса шагьраххуллу. Ва ххуллул лагмагу вил яруннил ласлай ду­ссар я батIин къашайсса тIабиаьт. Щил ци учирчагу, дакъассар жулла цамур Ватан, вай зун­ттурду ва вайннул ххинчурдай­сса хъу-лухччив дакъа.Бусалардавун багьсса КьукIма-Зунттул дяликIулувун нанисса ххуллу буссар бигьану кувссан тавтсса бизанттайх гьаз хъанай най. Ца лахIзалуву на Ккуллал фермардайн увцуну нанисса, Дарбанттлия ттучIан хъамалу увкIсса куявнал МахIаммадов Ризваннул машина, гуж биял къахъанай, хIурхIа хъанан бивкIуна. Ризваннул ттухь бувсуна, инсаннан кунма, машиналунгу зунттавусса гьава биял къахъанай укун ттахъ-ттухъ тIий найгу бивкIун, яла нанаву цила кIанийн дагьайшиву.
Бивунав жу Дагъусттаннал зунттавусса яла лахъмур дяликIулийн. Ва КьукIма- Зунттул дяликIулул лахъшиву дур 2619 метра. Укун лахъсса дяликIу духьурчагу, ва яла бигьамур, ххуйсса ххуллурду бумур дяликIуну хIисав дуллай бур. Буниялагу, ххуллурду ххуйсса бия.Шичча ябивтсса чIумал, чуврив тий архну цамур кIанттай, вай кьинирдай ххал къашай­сса зунттурдал кьабакIраву ца-кIира марххалттал лиссурдугу чIалай дия.

[dropcap]Г[/dropcap]ания гихунмаймур жул ххуллу Агъуллал чулийнмай нанисса бия.Цаппара манзил битайхту бивунав жу Ккуллал СПК-лул ижаралий цала шяравасса Рамазанов Амучи тIисса адаминахьхьун дуллусса «Кума» цIанилусса, ххуллул кия чулий­сса фермалучIан. БакIраятува кIицI буван, вай нава иян лавгсса шаннагу Ккуллал ферма дия гъинттулсса фермарду. Ссуттихунмай, дяркъу хъанан дикIайхту, гъаттара Ккуллал шяравусса фермардайн куч байсса бия. «Кума» фермалия ттухь бувсуна шикку бригадирну зузисса АьвдурахIимова Сидратлул.
— ЖучIа шикку бур 80 -луннийн бивсса ттизай оьллу. Бур мукунма вайннул бярчру.Вай личIи-личIину гьухъаллайн лагайссар. Оьллу кIийла ттизайссар, кIюрххил ва кьунниялай. Жу вай накIлия дувару нис. Нис ласун бучIай шихава, Агъуллал чулухамур ххуллийх, Дарбантуллал машачитал. Нава бакъа, шикку зий бур ялагу: Нажаев Кьурбан,МахIмудова Галина,Мусиева Аьйшат, МахIмудов Мирза,ХIажиев Мусттангир, Мусиев Арсен, АьвдурахIимов Рамазан. ХIатта жул даву захIматсса, аькьувалийсса духьурчагу, кулпатран дуланмагъ хъанахъисса хайрссагу дур, — куна Сидратлул.
Шикку зузисса зузалтран ччай бакъая ттул фотоапаратрал хьхьичI бацIан. Мунияту на нава ихтилат бувсса АьвдурахIимова Сидратлул шакил рирщуссия.
Шиккува ттун бакIрайн агьуна Ккуллал шяравасса Пайзуллугь АхIмадовгу. Ва ия МВД-лул къуллугъ кьабивт­сса полковник.
— На, уттигъанну къуллугъ кьабитаннин, арулла шинал мутталий зий уссияв Шамххаллайсса дуснакьрал хъунаману. Ряххилчинмур классраву дуклакисса чIумал гъинттул ши­ккусса яттичIасса хIухчалтран дукра дуллай цIигьурну зийгу ивкIссара. На гания махъ цалагу шиккун къаувкIссияв. Мунияту увкIра нара цIигьуршиву дуллай, ттула оьрчшивруцIун бавхIусса кIанттурду ххал буван. Зунттурду ялагума ххуй хьуну, уртту-тIутIан тавтун бур. Бакъар анжагъ шикку ттун ятту чIалай, — куна ттущалсса ихтилатраву Пайзуллагьлул.

[dropcap]Г[/dropcap]ания гилуннаймур фермалун цIа дия «Мазубалу» тIисса. Га дия Ккуллал шяраваллил СПК-лул ферма. Гикку фермалий каялувшиву дуллай ия ШиххIасанов Исрапил.
— ЖучIа бур 78 ттизайсса оьл. Вайннун кIинттулнинсса лазуни хIадур дуван бучIайссар шяравату бригадартту. Яла, вай дузал къахьурча, Бабаюртуллал даралува люцерна дурив, салума дурив, дучIан дайссар . Жу оьллаща ттирзусса накIлия дувару нис. Нис ласун жучIан бучIайсса ишбажаранчитал бикIай МахIачкъалалиясса ва Дарбантлиясса.Шикку зий бур: ШиххIасанова Шюъбанат, Чупанова Лариса, Расулова ПатIимат, Расулова Жамила,Чупанов Халид, — бувсуна ттухь Исрапиллул.
Исрапиллул бригадамур бавцIуна шакил рищун.

Хъиривмур ферма дия «Бартнеххаялу» тIисса. Ва фермагу дия Ккуллал шяраваллил СПК-лул ферма.Шикку бригадирну зий усса ия Рамазанов Сергей. Амма, на шиккун увкIний, ва цала даврил ишир­ттай лавгун, фермалий акъая. Мунияту шиккусса давурттая ва зузалтрая ттухь бувсуна Сергейл оьрмулул дус Рамазанова Издаглул:
-Жул фермалий бур 80 ттизайсса оьл. Бур мукунма вайннул бярчругу. Шикку зий бур 5 кулпат. Бур таксса зузалтгу. Жугу, вайми Ккуллал фермардал кунна, дувару нис. Вай жучIанма бувкIсса муштаритуран даххайссар. Жул даврил сияхI хъанахъиссар ттирзу­сса накIлийнусса. Миннух булайссар багьагу. Зий бур жучIа: Мусиева Марина,ХIусманова Имаша,Исупаева Муъми­нат, Исупаев Рамазан, Аллаева Раисат, Аллаев Ялла.
Дуниял гъарал лачIун лагма лаглай душиврийн бувну, жула машиналуща КьукIма-Зунттул дяликIулувун гьаз хьун къабюхъанссар тIий, лахъи къалавгун жун махъунмай бачин багьуна.
Укунсса хьуна ттул га кьини­сса Ккуллал шяраваллил фермардайнсса аьрххи-ххуллу.
Зузияра, уссурвал, ссурвал!