[dropcap]Р[/dropcap]амазан АьбдуллатIиповлул республикалул агьалинахь барча дунни Аьрасатнал Федерациялул ПаччахIлугърал Кьини.
«Ва дур миллатру цачIун буллалисса, халкьуннал рухI-ссихI чIалачIи дуллалисса, лавгмур заманалул, цIанасса чIумул ва ялун бучIантIимунил лишанну хъанахъисса байран.
ПаччахIлугърал ттугълил бусласиссар Ватандалухсса жулла ччаврия, ганил кьуват бусса гужирдайнсса вихшалалия, тас­ттикь дуллалиссар никирая никирайнсса дахIаву.
ХIакьину паччахIлугърал ттугълилу дагъусттанлувтурал цалва гьунарду кка­ккан буллай бур элмулуву, куль­туралуву ва спортраву хьхьичIуннайшивуртту хьун дуллай бур, дакI марцIну зий бур жула билаятран хъиншивуртту шаврил цIаний.
Республикалул циняв ялапарлувтуран чIа тIий ура дакьаву, паракьатшиву ва барачат, цIакьсса цIуллушиву, циняв иширттаву тIайлабацIуртту Дагъусттан ва Аьрасат тIутIайх бичаврил цIаний» тIий бур барча баврий.

«Ттул Ватандалул Ттугъ» тIисса концерт хьунни МахIачкъалалив августрал 22-нний Оьруснал театрданул хьхьичIсса майданнив. Аьрасатнал Федерациялул ПаччахIлугърал Ттугълил КьинилуцIун дархIуну, концерт сакин дурну дия Республикалул Халкьуннал творчествалул къатрал.
Концерт дайдишин хьхьичI МахIачкъалаллал мэр Муса Мусаевлул кIицI лавгунни Аьрасатнал ПаччахIлугърал Ттугълил мяъна хъанай душиву билаятрал халкьуннал цашиврул лишанну. «Ва ттугълилу ласайссар спортраву ххувшавуртту, ккаккан байссар давривусса гьунарду», — кунни мэрнал.
Яла Аьрасатнал Гимналухун щалва сахIналийх тIитIин бунни Аьрасатнал Федерациялул ттугъ. Триколорданущал­сса лиссурду дарчIунни концертрайн бувкIминнайх. Муния махъ хьунни патриотшиврул балайрдал фестиваль, микку гьур­тту хьунни МахIачкъалаллал ОьрчIал филармониялул артистътал ва ПаччахIлугърал филармониялул балайчитал.
ХIасан Аьдилов