«Хъунмасса Аьрасат» тIисса Щалвагу Аьрасатнал ихIсандалул автопробег августрал 12-нний дирунни Дагъусттаннайн. Гара кьини автопробеграл гьурттучитал хьунабавкьунни журналистътуращал.
Суаллахьхьун жавабру дуллай бия «За суверенитет России» кказитрал хъунама редактор , Аьрасатнал национал – тархъан баврил координатор Марк Сагадатов, протопрей Отец Александр, автопробеграл каялувчи Александр Ермаков, НОД-рал (национально-освоболдительное движение) гуманитар бутIул координатор Елена Гой.
Марк Сагадатовлул журналистътурахь бувсъсса куццуй, автопробег байбивхьуну бур июньдалул 12-нний Колымалул хъуншагьру Магаданнаяту. «ХIакьину дурусну 2 барз хъанахъиссар жу ххуллийн бувккуну. ЦIу бутIуй жул пикри бивкIссар укунмасса автопробег буван, жулва НОД-рал штабирттайн бияву мурадрай. Яла цамур пикри хьуна: шагьрурдайн най бунува ихIсандаран Донецкаллал ва Луганскаллал агьалинан кумагрансса арцугу ратIин садакьа хIисаврай», увкунни ганал.
М. Сагадатовлул мукъурттийн бувну, ва проектрал мурад хъанахъиссар оьруснал аьрщив ва агьали цачIун баву оьруснал ва циняв уссурвалсса халкьуннал хIакьсса мурадру буруччаврил цIаний.
Автопробеграл каялувчи Александр Ермаковлул бусаврийн бувну, укунсса проект дузрайн дуккан дпаврил пикри хьуну бур ванияр ца шинал хьхьичIва. Автопробеграл дуллалиссар паччахIлугIрал бакIчинал дуллалисса давурттал агитация. «Автопробеграл лагрулий Аьрасатнал 70 шагьрулийх дуккан дантIиссар уттигъанну чарчусса Къазаннал икона «Державний покров».
Ермаковлул увкусса куццуй, ччянияцIава, хIатта СССР пасат хьуну махъсса шиннардийгу кьатIаллил гужирдал хIарачат буллай бур жула билаятрай тагьар оьлукъин дуван «Жу мукунсса иширттайн къаршимиру. ЦIана автопробеграй гьурттуну ур 14 инсан. БучIиссар ччиманан жущал архIал ачин, хIала-гьуртту хьун. Гьарца шагьрулий жу дуаьртту дуккайссар, митингру-концертру дайссар ва арцугу ратIайссар Донбассрал агьалинан кумагран», — увкунни Ермаковлул.
Шагьрурдай дуккайсса дуаьрдал (молебни) хIакъираву гьартану бувсунни Отец Александрдул. Гой Еленал бувсунни Аьрасатнал шагьрурдал халкьуннал цивппа цукун кьамул буллай буссарив, цукун кумаг буллай буссарив Донбассрал агьалинан.
ХIасан Аьдилов
