Августрал 4-нний МахIачкъалаллал «Анжи» футболданул майданнив хьунабавкьунни «Ростов» командалущал.
ХьхьичIмур тIуркIулий «Ростов» 1:0 счетращал ххув хьуссар «Амкар» командалуяр. «Анжи» тIурча, дух хьуссия мура счетрай «Локомотив» командалияр.
Цалчинмур таймрал дайдихьулий жула гьужумчи ХIасан Мамонтовлуща, Яковлевлул цачIанма гьан бувсса ттуп «Амкардул» къапулувун бивщуну бакьин къавхьунни. Ва иш хьунни тIуркIулул цалчинмур минутIрай.
Цахъи хIаллава «Ростоврал» ялунмюхчанчи (полузащитник) Ингасоннул архния бивщуну гьан бувсса ттуп жула къапучи Солосиннул байщун бунни, амма ялун ивсса гьужумчи Дедюннул «Анжилул» къапулувун тIайлабацIан бунни ттуп.
Гихунмаймур тIуркIу най бия «Анжи» командалул муттаэтурал къапулийн гьужум буллай. Жула командалул хъунама тренернал баххана бунни майданнай ттуплий буклакисса футболистал. Гол бакьинсса шартIру «Анжилухьхьун» диривуна, так ттуп бакьинма жула командалуву ва кьини къалявкъунни. ТIуркIулул ахирданий «Ростоврал» гьужумчи Зуевлухьхьунгу диривуна жула къапулувун гол бакьинсса каши. Ванащал баранбал увксса жула къапучи Солосиннул гьужумчинал бивщусса ттуп къапулувун гьан бан къабивтунни.
Ахиргу, тIуркIу къуртал хьунни 0:1 счетрайну.
«Анжи» — «Ростов» — 0:1
Гол: Дядюн, 19
«Анжи»: Солосин, Мусалов, Фибел, Брызгалов, Попуяхтов, Хубулов (Базелюк,66), Тетрашвили (Данченко, 46) Афонин, Маркелов, Яковлев, Мамтов (Липартия, 63)
«Ростов»: Песьяков, Калачев (Думбия, 76) Вилюш, Ингасон, Мевля, Устинов, Паршивлюк, Юсупов (Могилевец, 76), Гацкан, Байрамян (Зуев, 58), Дядюн.
Августрал 8-нний Хабаровскалий МахIачкъалаллал «Анжи» ччалли дурккунни «СКА-Хабаровск» командалущал.
Ва кьини «Анжилул» хъунама тренернал хьхьичIмур тIуркIулий дух хьусса жула командалуву аххана увну ия шама футболист.
Дайдихьулий кIирагу команда ца дуциндарайсса тIуркIу бачин бувну дия.
ТIуркIулул кIилчинмур бутIуй «Анжилуща» бювхъунни муттаэтурал къапулийн гьужум ххи бан. Амма, «СКА-Хабаровск» командалул къапулувун гол бакьинсса кIанай, ттуп жула къапулуву «хъамалу» бан багьунни. ТIуркIу къуртал хьуннин «Анжи» хIарачат буллай дия гол бакьин. Анжагъ, тIуркIулун итадаркьусса чIумул ялун ххи дурсса минутIирттай «СКА-Хабаровск» командалул бавкьунни «Анжилул» къапулувун ца ялагу ттуп. Ахиргу, тIуркIу къуртал хьунни 2:0 счетрайну. Ва хъанай дур цаннил ца хъирив шамилчинсса бухшаву.
«Анжилул» хъиривмур тIуркIу хьунтIиссар августрал 12-нний МахIачкъалалив Москавуллал «Динамолущал».
«СКА-Хабаровск» — «Анжи» — 2:0
Голлу бавкьунни: Маркович, 68, Калинский, 90+5
«СКА-Хабаровск»: Довбия, Черевко, Эдиев, Пуцко, Димидко, Новаловский, Баляйкин (Калинский, 67), Дедечко, Габулов (Казанков, 46), Корян (Никифоров, 73), Маркович.
«Анжи»: Солосин, Мусалав, Фибел, Брызгалов, Полуяхтов, Маркелов, Афонин, Данченко, Яковлев, Догов, 71), Липартия (Мамтов, 58) Базелюк (Кацаев, 57).
Р.S. Ялун личлан бивкIунни «Анжилул» хъунама тренерну Александр Григоряннун кIанай итан ччай усса ур Валерий Карпин тIисса хаварду. Ва зий ивкIссар «Спартак» (Москва), «Мальорка» (Испания), Торпедо (Армавир) командарттал хъунама тренерну.
ХIадур бувссар
Р. Къардашовлул
