Дагъусттаннал УИС-рал идарарттай хьунни экстремизмалул ва терроризмалул идеологиялийн къарши бацIаврин хас дурсса мероприятияртту. Профилактикалул давуртту дуллай бур, дуснакь бувминнащал дакъассагу, идарарттай зузиминнащалгу.
Дин-чак дуллалиминнащал зузисса Дагъусттаннал УФСИН-лул хъунаманал кумагчиМахIаммад МахIаммадаьлиевлул ччя-ччяни дувай диндалул ишккаккултрал дуснакьраву щябивкIминнащалсса ва шикку зузиминнащалсса хьунабакьавуртту.
Ва ххуллухь республикалул Муфтиятрал председатель АхIмад Аьбдурашидовлул бунни зузалтращал исламрал гьанурдая, личIи-личIисса диннал дянивсса нахIу-хIалимсса арардая, УИС-рал идарарттай экстремизмалул идеология ппив хьун къаритаврия бусласисса ихтилат. Укуннасса хьунабакьавур­тту хьунни сайки цинярда УИС-рал идарарттай. Вайва гьантрай диндалул вакилнал бунни «Ислам террорданийн къаршину» тIисса семинар конвойрал отделданул зузалтращал.
Дагъусттаннал УИС-рал идарарттай мудан дуллай бур дуснакь бувми закондалийн мютIину бикIаву, миннал дянив политикалул, диндалул, миллатрал гьанулийсса къалмакъаллу къашаву, терроризмалул ва экстремизмалул идеология ппив хьун къаритаву мурад­райсса давуртту.
7-мур тIайла бацIан баврил колониялий дуснакь бувминнащал хьунабавкьусса чIумал, диндалул вакилтурал бувсунни экстремизмалул журардая ва Аьрасатнал обществалун нигьачIаву дусса миннал мухIлухIиндарая.
— Жула ас-намусрайну, цайми диннал вакилтуращалсса нахIу-хIалимсса арардайну, рахIму-цIими бушиврийну ккаккан дан аьркин_ссар жура жула диндалул ххуй-хъиншиву, — увкунни дуснакь бувминнахь АхIмад Аьбдурашидовлул. Цала ихтилатраву ванал кIицI лавгунни дин гужирай ялув духIияра тIисса кIанттурду бакъашиву. Гьарица инсаннахь цанна ччимур дин дансса ихтияр душиву, бусурманчугу, цаламур дингу дуллай, цува усса кIанттурдай цамур дин дуллалиминналгу, миннал диндалулгу хIурмат буну, авкьуну икIан аьркиншиву.