Июльданул 18-нний МахIачкъалаллал троллейбусирттай лахъ бувссар багьа. Ттинин троллейбусирттай щябикIаврихлу ласлай бивкIсса 10 къурушрал багьа махъва-махъ лахъ бувну бивкIссар 2011 шинал.
З. АьбдурахIманова
Хъуншагьрулул администрациялучIасса транспортрал ва связьрал управлениялул пишакарнал бусаврийну, маэшатрал хIакъи-хIисаврттайн бувну, ца инсанная троллейбусрай щяикIаврихлу дагьлай дусса дур 21 къуруш. Му багьлувун дагьлагьисса 11 къуруш дотация хIисаврай дулайсса дур шагьрулул хазналува.
Хъунмасса бурж сававну, шагьрулул кIичIирттавух троллейбусру занай бакъассия цаппара нюжмардул хьхьичI. Управлениялул пишакарнал бусаврийну, уттигъанну цIакь дурсса кьутIилийну Троллейбусирттал управлениялул ва ттукI баххай идаралул икьрал дурссар 35 млн. арцул бурж лахъан чан-чанну шинал ахирданийнин дуллай.
Ва бакъасса, шагьрулул Троллейбусирттал паркравун сентябрьданийнин Москавлия бучIантIиссар цIу бувну, бакьин бувсса 15 троллейбусгу.
