АьвдурахIманнул душ Бургъуева Парихалун

Июль зурул 11-мур кьини, тамансса хIаллай къашавайгу бивкIун, аьпалувух бивхьунни ТIулизуннал шяраватусса АьвдурахIманнул ва Бикал душ Бургъуева Парихалун.

Парихалун бувну бур ТIулизмав 1938 шинал. ШавкIрав дянивмур даражалул школагу къуртал бувну, ичIурасса, кьатIухсса давуртту дуллай, нитти-буттан ка-кумаг буллай бивкIун бур. Ванил оьрчIшиву ларгун дур та чIумалсса циняв оьрчIал кунна. Тай шиннардий зунттал душру лавайсса даражалул кIулшиву ласун шагьрурдайн гьан баву кьалайкьсса низамну чIалай диркIссар, мунияту Парихалунгу буттал къатлуву, ххуйсса нитти-буттая тIул-тIабиаьтгу лахьлай, хъунма хьу­ссар. ЧIун дирукун, ванил талихIсса ташу хьуссар Хъурхъиятусса ххуй­сса агьлу-авладрал жагьил Бургъу­хъал Кьурваннущал. Вайннал дянив хьусса ца душ ва кIия оьрчI, ххаллилсса тарбиялий хъунигу бувну, дуккингу бувну, цала-цала оьрмулул ххуллурдай бивхьуссар.
Пенсиялийн букканнин Парихалун зий буссия домоуправлениялий комендантну. АрхIал зузинащал хIал бавкьусса, чIяву гъалгъа бакъасса, иминсса инсан бия ва. Парихалун, гьарца чулуха бювхъу­сса, дакI-аьмал хъинсса, гьарнан ка-кумаг буван, чIарав бацIан чялиш­сса буну тIий, бусравнугу, ххиранугу бия жяматран, чIахху-чIарахнан, гъан-маччанан.
Хъунама ласнал уссил оьрчIал ванийн «аму-дадайя» учайсса, Парихалуннул цайвасса цIимигу, хIурмат-иззатгу кIулну.
Лавгунни дунияллия ххишала бакъа ххаллилсса лакку хъамитайпа.
Парихалуннул бивкIулул хъуннасса кьурчIишиву кIидачIлай, жижара буллай буру уссихь Аьли­ша АьвдурахIмановичлухь, душнихь Оксанахь, куявнахь Мустапахь, арсурваврахь ЯхIияхь, МахIаммадлухь, ссихь Марияннухь, вайннал оьрчIахь, щалагу агьлу-авладрахь. Цув Алжаннул ххари баннав, гьав нурданул дуцIиннав. Амин!

ТIулизуннал,
Хъурхърал жяматрал чулуха Гуржигьан Къараева

---

МахIаммадлул душ Камилова
Зулайхат

КIира шинал хьхьичI оьр­мулул къабувччуна дунияллия лавгсса ЧIяйннал шяравасса МахIаммадлул душ Зулайхат Камиловал аьпалун.

Най бур вай гьантригу,
Барзру ва шинну,
Жул дакIурдил къюву
Хьхьара къархьуну.

Хьхьувай шану бакъа,
Яру бур хъатлай,
Аллагьнал чичрулийн
Ссавургу дуллай.

Дунияллул чанир,
Жуя левщусса.
Кулпатрал ялату
Ина лавгусса.

Циняв инсантуран
Бусравсса бияв.
Вин къабуллу оьрму
ОьрчIан булуннав.

ЦIуцIаврища оьсса
Ххассал бан къавхьсса,
Гьав нурданул хьуннав,
Алжан булуннав.

Къаттагу бявкъунни,
Баргъгу левщунни.
Укун най бур утти
Ва жул оьрмугу.

Къатта бачIва хьуну,
Жу ливчIун буру.
Вай дакIурдивату
Буклай бакъара.

Ина дакIния къабуклакисса гъан-маччами

---

«Жула Асбат»

«На крыльях времени уносится печаль»
Ж. Лафонтен

Июльданул 8-нний аьпалу­хьхьун лавгунни ЧIяйннал шяраватусса Калла-РахIухъал Кариннул ва Кьубил-Аьлилхъал Камилатул душ, Ккуллал райондалий бакъа­ссагу, Дагъусттаннал Респуб­ликалий машгьурсса учительница Рамазанова Асбат.
Асбат бувссар 1929 шинал ЧIяйннал шяраву, канил пагьму магьирсса кьяпрал дарзинал кулпат­раву. АьсатIиннал хъуншагьрулий Орджоникидзелий (Владикавказ) арулва классгу марцIсса ххювардай къуртал бувну, зана хьуну бур бу­ттал шяравун, 1949 шинал марцIсса ххювардай къуртал бувну бур школа, зун байбивхьуну бур шяраваллил библиотекарьну, школалул хъунмур пионер-вожатыйну. 1953 шинал къуртал бувну Дагъусттаннал хъаннил пединститутгу, байбивхьуну бур зун оьрус мазрал ва литературалул дарсру дихьлай. 1962 шинал цилла кIулшиву хъиннура гьаз дуваншиврул, бувххун бур Дагъусттаннал ПаччахIлугърал пединститутравун, гагу къуртал бувну, ЧIяйннал школалий лавайми классирттаву ­оьрус мазрал ва литературалул дарсру дихьлай буссия. Ванил дарсирдах хъуннасса шавкьирай, гъирарай вичIи дирхьуну бикIайва дуклаки оьрчIру, ванин дакIних кIула Пушкиннул, Лермонтовлул, Байроннул, Гьарун Саэдовлул, МухIуттин Чариновлул, Костя Хетагуровлул, В. Маяковскийл, Толстойл, оьруснал цаймигу ва дунияллул классиктурал произведенияртту.
Цала сянатрал бурж лажин кIялану биттур буллалаврицIун Асбатлул оьрму лавгунни жяматийсса иширттавух чялишсса гьурттушинна дуллай. Ванил цикссагу шинну дунни колхозрал школалул парторганизациярттал секретарьну, райОНО-рал оьрус мазрал ва литературалул методсекциялул хъунмурну, шяраваллил хъаннил совет­рал председательну.
Асбат Каримовна цаппара шиннардий зий бивкIссар школалул завуч-организаторну, 1971 шиная 1979 шиналнин зий буссия директорну. Асбатлул бусравшиву, ванил хIурмат лап лахъсса бия райондалул агьалиначIа. Мунил барашиннану хъанай бур «Жула Асбат», «Асбат Каримовна», «ЧIяйннал Асбат» тIисса калимартту. Хъуннасса даву дуллай бия Асбат, дуккаву ва культура (маданият) цаннищал ца архIал дачин дурну, оьрчIан культуралухсса гъира бутан. Ванил сакин бувссия «ЧIяйри душ» тIисса фольклорданул коллектив. Москавлив фестивальданий зунттал хъаннил хьхьичIарасса лаххиялухлу, къавтIавурттал караматшиву кка­ккан даврихлу ва коллектив лайкь хьуссар «ТIивтIусса ссавнилусса музей» киносуратрайн ласун.
Асбат Каримовна бия гьарца чулухунмай итххявхсса хъамитайпа. Ванил хъинну ххуйну, вичIи дирхьунан асар биянну балай учайва, урувгма хIайран хьунну къавтIун бизайва, хъинну бюхханну махъ лахъайва. КIяламунийн – кIяласса, лухIимунийн – лухIисса учайва.
Асбатлун дуллуну дур «Да­гъусттаннал лайкь хьу­сса учитель», Дагъусттаннал Президентнал ссят, «ЗахIматрал ветеран» медаль, СССР-данул Просвещениялул министерствалул ХIурматрал грамота, бувчIуну бур цимилагу райондалул ва шяраваллил советирттал депутатну, ларсун дур личIи-личIисса бахшишру.
Асбат Каримовнащал чIярусса шиннардий зий ивкIсса учитель, лакрал ххаллилсса шаэр Ися МахIаммадовлул чирчуну дур «ЧIяйннал Асбатлухь» тIисса наз­му:

Цими дуклаки оьрчI итаавкьурвав,
Муаьллимну зисса шиннардий ина!
Циминнал увкурвав
вихь барчаллагьгу,
Инара дирхьу дарс
хъамакъаритлай.
ХIакьинугу вил цIа бусравнура дур
ЧIяйннал шяравугу, райондалийгу,
Оьрус мазрал дарсру
ххирар вил оьрчIан,
Дишайну тIий ина гай ккаккияну.

Асбатлул бивкIу ххишала бакъа кьувтIунни щалвагу ЧIяйннал жяматран, Ккуллал райондалул интеллигенциянан, ванил дарс дирхьусса чIявуссаннан.
Асбат Каримовнал кьариртссар ххуйсса цIа. Хъунмасса умуд бур ванил цIа адаврай ядуванссар ванил наслулулгу тIий.
Ванил бивкIу чувшиврий бухIан цIуллушиву дулуннав Татьянахьхьун, Гуржагьрахьхьун, ПатIиматлухьхьун, Валерияннахьхьун, Мустангирдухьхьун, Асланнухьхьун, Кариннухьхьун, ссихьхьун Марияннухьхьун, гъан-маччанахьхьун.
Асбатлун къабуллумур оьрмулул бутIа ванил наслулун ххи бувну лякъиннав!
Цил бунагьирттал аьпа баннав, рухI паракьатний дишиннав.
ЧIяйннал жямат