Июльданул 18-нний Дагъусттан Республикалул БакIчи Рамазан АьбдуллатIипов подмосковуллал Жуковскалий гьуртту хьунни ХIII Дунияллул халкьуннал дянивсса авиациялул ва космический МАКС-2017 салон тIитIлатIисса шадлугъравух ва миккура ххал дунни авиациялул выставкагу.
Форумрай цалла продукция дирхьуну дур Аьрасатнал ва чил билаятирттал 650-нния лирчусса фирмардал, цинярдагу – аьрали агьамшиву дусса 700-нния лирчусса экспонатру. Выставкалувух гьурттуну бур 36 билаятраясса 180 корпорация ва компания.
БавтIминнал хьхьичI махъ лахълай, Аьрасатнал Федерациялул Президент Владимир Путиннул увкуну бур:
— Билаятрал космонавтикалул ва авиастроениелул тарих – миллатрал пахрур, Королев, Поликарпов, Сухой, Туполев, Ильюшин кунмасса цIанихсса конструктортурал дурмур кунмасса. Жулва хIакьинусса агьаммур масъалагу – миннал цIакь дурсса аьдатру гихуннай дачин давур. Авиация хьхьичIуннай даву, космос лахьхьаву Аьрасатнал обществалул итталу мудангу диркIссар, най буна учин бюхъанссар – ва жула аьмсса культуралул агьамсса бутIар куну.
Цаппарасса гьантрал лахъишиврий Жуковскалий ккаккиялун дирхьуну дикIантIиссар гьарта-гьарзасса экспозиция. Цалла разработкартту ккаккан дувантIиссар Аьрасатнал ва чил билаятирттал компаниярттал, хьунтIиссар конференцияртту ва семинарду, переговорду ва уртакьшиврийсса зузаврил кьутIирду чичаву. Умуд буссар вай циняв давурттал билаятрал кооперация цIакь дуванссар, дунияллул халкьуннал дянивсса уртакьшиврийсса зузаврил арарду гьарта-гьарза дуванссар, Аьрасатнал продукция виваллил ва чил билаятирттал рынокирттай хьхьичIуннай даврийнсса кабакьуну хьунссар тIисса. ЖучIара дуссар ккаккан данмургу, маслихIат дуванмургу, — увкуну бур билаятрал бакIчинал.
Дунияллул халкьуннал дянивсса МАКС-2017 авиасалондалий Къизлардал электромеханикалул заводрал (концерн КЭМЗ) ккаккиялун дирхьуну дур мукьва кIану бусса, куклумурнияргу куклусса цIусса МАИ 411 самолетрал куц. Му дурну дур авиациялул алюминдарая, ялттугу даркьуну дур хъинну куклусса композит материал. Заводрал планнаву бур ва журалул 3 самолет дуккан дувансса. Проектрал ялув зий усса ур 18 пишакар.
Дагъусттаннаясса цамур идаралул – «ЩатIи» цIанилусса ДНИИ АО-лул форумрай дирхьуну дур лехлахисса аппаратIирттансса радиоэлектрон аппаратура.
Дагъусттан Республикалул БакIчи Рамазан АьбдуллатIипов ва Аьрасатнал Президентнал Ухссавнил Ккавкказуллал Федерал Округрайсса вакил Олег Белавенцевлул ххал бувну бур цIусса самолетрал куц ва яхши-хаш бувну бур Къизлардал заводрал каялувшиндаращал, ххал бивгьуну бур му идаралул даву гихуннай гьарта-гьарза даврийн багьайсса суаллу.
Му бакъассагу, хьунабавкьуну бур Аьрасатнал Виричу, летчик-испытатель, «Авиация» корпорациялул президент, МАКС авиасалондалул хIурмат бусса президент МахIаммад Толбоевлущал.
Республикалул БакIчинал баян бувсса куццуй, ва форумрал лагрулий чирчуну дур производствалул ва техникалул уртакьшиврийсса зузаврил шанна чулухасса кьутIи: «МиГ» РСК, «ОДК-Климов» ва концерн КЭМЗ. Муний къулбасру дурну дур Къизлардал электромеханикалул заводрал гендиректор Ибрагьим АхIматовлул, «ОДК-Климов» предприятиялул исполнительный директор Александр Ватагиннул ва «МиГ» РСК-лул гендиректор Илья Тарасенкол.
Бадрижамал Аьлиева
