Вай гьантрай «Газпром трансгаз Махачкала» ООО-лул майданнив «Магистраль-2017» цIанилусса Каспий хьхьирил зумардацIухсса жагьилтурал форум къуртал хьунни.
З. АьбдурахIманова
Ванивух гьуртту хьун увкIун ивкIссар личIи-личIисса регионнайсса «Газпром» группалул 25 жагьилсса пишакар. Форум цуппагу хас бувну бия экологиялун ва муницIун бавхIусса масъаларттан. Гьашинусса шин жула билаятрай Экологиялул шиннугу баян бувну духьувкун, чансса дакъар ва аралуву дуллалисса мероприятияртту. Масалдаран, ваниннин хьхьичI «Ккавкказуллал тIабиаьтрал центр» АНО-рал сипталий дурну диркIссар экологиялун ва биожурардан (биоразнообразие) хасъсса щалва Аьрасатнал жагьилтурал дянивсса конкурс. Микку ххув хьусса лауреатътуран бахшишру дуллалисса шадлугърая дайдирхьунни форумрал давугу. Хъирив тIурча, «Газпром трансгаз Махачкала» ООО-лул, «Ккавкказуллал тIабиаьтрал центр» АНО-рал ва «Дагестанский» тIисса ПаччахIлугърал тIабиаьтрал заповедникрал дянив цIакь дурунни жулла республикалий ЮНЕСКО-лул геолологиялул парк баврил хIакъиравусса кьутIи.
Форумрал агьаммур давуну хьунни жагьилсса пишакартурал хIадур бувсса 23 докладрах вичIи дирхьуну, ми ххал бивгьусса элмийсса конференция. Шиккугу хъунмур къулагъас дурунни газ нанисса магистрал турбарду бакьин буллалисса давурттал чIумал ишла дан маслихIат буллалисса инновациялул технологиярттах ва цаймигу диагностикалул журардах.
