Кулпатрал, ччаврил ва имандалул кьинилул хьунийн МахIачкъалаллал ЗАГС-рал пишакартурал ва шадлугърал кьинилущал барча бувну бур 50 шинай цачIу ялапар хъанахъисса Къушиевхъал кулпат. Му барча бан ЗАГС-рал зузалт бувкIун бур миннал шаппайн.
З. АьбдурахIманова
Оьрмулухун учительталну зий, оьрчIал цимирагу ник тарбия дурсса Читтурдал шяраватусса Пайзуллагь ва Айманат Къушиевхъул, цачIу ялапар хъанахъисса вайксса шиннардил дянив ххаришивурттугу, кьурчIишивурттугу дурхIуну, хIакьинугу цаннаха ца аякьалий, оьрчIал ва оьрчIал оьрчIал ххари буллай, цачIу яхъанай бусса бур. Кулпат бувну хъунма хIал къалавгун, 1967 шинал вай ялапар хъанан бивзун бур МахIачкъалалив. Шагьрулул школалий учительну зун ивкIун махъ МахIаммад-Расуллул арс Пайзуллагь лайкь хьуну ур 17 шинай №37 школалул директоршиву дан. Ванал аьзизсса кулпат Айманатлулгу цила оьрму хас бувну бур учительнал пишалун, шагьрулул № 4 школа-интернатрал дуклаки оьрчIан за лахьхьин буллай ва ми тарбия буллай.
КIиягу лайкь хьуну бур личIи-личIисса наградарттан ва грамотарттан. Вайннувух дур халкьуннал просвещениялул отличникнал, ДР-лул лайкь хьусса учительнал ва РСФСР-данул халкьуннал дуккаврил отличникнал цIарду.
ХIакьину Пайзуллагь ва Айманат, пенсиялийнгу бувккун, кулпатрал вирдакIну, оьрчIал ва оьрчIал оьрчIал хъихъи бивтун, хIурмат-бусраврай бур. Къушиевхъал бур 3 оьрчI, вайннаягу ттаттал ва амудадал ялун-лун бучIайсса 8 оьрчIал оьрчI бивзун бур, вайнналгу 4 оьрчI бур. Вайннан дазу-зума дакъа хъинну ххирану бур цала ттатта ва амудада.
Кулпатрал, ччаврил ва имандалул кьинилущал МахIачкъалаллал бакIчи Муса Мусаевлул цIания барча буллай, ЗАГС-рал пишакар Заира Оьмаровал чIа куну бур вайннан цIуллушиврийсса ва талихI-тирххандарайсса оьрму. Барча бан бувкIминнал дуллуну дур Къушиевхъан бахшишру ва тIутIал кацIру. Лас-щарнихь къулбасру дуван тавакъю бувну бур МахIачкъалаллал хIурматрайсса юбиляртурал луттирайгу.
Циксса шинну гьарчагу, цавагу цала оьрмулуву хьусса иширай хIайп тIий бакъар вай. Цанчирча лайкьну ва ххаллилну бувтун тIий цачIу оьрму.
МахIачкъалаллал ЗАГС-рал Управлениялул аьдатри гьар шинах ва шадлугърал кьинилул хьунийн укун эбратран бишин бучIисса, цаннащал ца нахIу-хIалану чIярусса шиннардил дянив ялапар хъанахъисса кулпатру, минначIан шаппа-шаппай бивну, барча бувайсса.
