Июльданул 5-нний байбивхьуссар «Чувшиврул майдан» тIисса оьрчIал ва жагьилтурал творчествалул фестиваль-конкурсравух гьуртту хьун гъира буминнаясса аьрзри кьамул буллай.
З. АьбдурахIманова
Ванил сиптачи Аймисай Амировал бусаврийну, конкурс-фестиваль, Цалчинмур каналданийсса «Машгьуршиврул минутI» тIисса проектраха лархьхьусса, сайки цава-ца мурадирал дусса дур.
«Конкурсрай дакъассар гужсса тIалавшиннарду дусса номинацияртту. Шиву гьур­тту хьун бучIиссар ваних гъира бусса, оьрмулул 7-18 шин хьусса оьрчIан ва жагьилтуран. Жу ххарину кьамул банну къавтIавурттаву, балай учавриву, КВН-далуву, шеъри бу­ккавриву, музыкалул инструментирттай макьанну дуцин кIулшивруву гьунарду бу­сса оьрчIру, душру, — бувсунни ванил.
Жагьилтурал гьунарду язи бугьантIиссар цаппара ятIапирттая махъ.
Цалчинмур турданий гьурттучитурал аьркинссар сакиншинначитурайн аьрза тIайла буккан. Яла «Первый Каспийский» тIисса телеканалданул сайтрая электрон журалул бланк цачIанна ларсун (скачать), муний цала цIа-бакIгу чирчуну, asyaamir7@mail.ry почталийн тIайла дуккан. Ва бакъасса, аьрза чичин бю­хъайссар Анжи-Ареналийсса «Мегастор» ттучандалийгу. Ми кьамул буллантIиссар августрал 5-нин.
Фестивальданул циняв гьурттучитуран булунтIиссар дипломру ва дакIний личIансса бахшишру.
ХьхьичIсса шанма кIанттун лайкь хьуминнан дулунтIиссар арцуйнусса бахшишру: цалчинмур кIанттух – 100 азарда къуруш, кIилчинмуних – 50 азарда ва шамилчинмуних – 30 азарда къуруш.
Шиккува бусан, гьунардал хIасиллу дувантIиссар жюрилул ва тамашачитурал чIурду буллуну махъ. ЧIава гьурттучитурал гьунарду социал сетирдаву ккаккан буллантIиссар ва ми ххуй бивзминнал чIурдайну язи бугьантIиссар. Гьарнал ца-ца чIу бакъа булун къабюхъаншиврул ялув бавцIуну бикIантIиссар сакиншинначитурал чулухасса хасъсса пишакартал.