Июль зурул 4-нний «Дагестан» РИА-лул редакциялий «ТIиртIусса хIукумат» проектрал лагрулий ва ххуллухсса пресс-конференция хьунни ДР-лул печатьрал ва информациялул министр Рашид Акавовлущал.

И. Саидова
Ванал бувсунни министерствалул хьхьичI бивхьусса агьамсса масъаларттая ва дурсса даврия.
Рашид Акавовлул кIицI ларгунни ведомствалул биялдарай­сса цаппара идарарттай дуллалисса цIушиннарду.
— ЦIанакул, арцул кризис дусса, захIматсса чIумал, бигьану ба­къар масс-медиалун. Аммарив жула кказитирттал, журналлал ва телеканаллал щаллуну дузрайн буккан буллай бур цала хьхьичI бивхьусса масъалартту, — увкуна министрнал.
Конференциялий министрнал хъуннасса къулагъас дунни миллатирттал мазурдийсса кказитир­ттал даврих.
— Миллатирттал мазурдийсса кказитру бухлахиссар Дагъусттаннал культуралул ва литературалул мусил фондравун. Вай кказитирттайгу зий буссар марцIну ниттил мазру кIулсса инсантал. ЦIанасса ппурттуву миллатирттал мазурдий­сса кказитру интернетравугу хъинну тIалавну бур. Мунияту цIанакул жу вай кказитру интернетраву машгьур баву мурадрайсса даву дачин дурну буру. Ялун нани­сса цIусса шинал паччахIлугърал ккаккан дурну дуссар миллатирттал мазурдийсса кказитру хьхьичIунмай баву мурад­райсса хасъсса тIалавшиннарду, — увкуна Рашид Забитовичлул.
Пресс-конференциялий сукку бунни буккултрачIан чIун-чIумуй кказитру биян къабуллалаврил масъаларттугу. Министрнал бувсунни ва кIанугу цала аякьалийн лавсун ушиву.