МахIачкъалаллал юбилей кIицI лагантIисса сентябрь зуруйннин шагьрулий щириркIуну най дур давуртту. КIичIиртту, скверду, паркру бакьин буллалаврицIун, ми чIюлу буллансса композицияртту, арт-объектругу дихьлай бур. Масалдаран, ххуй чулиннайсса мадарасса дахханашивуртту хьуну дур шагьрулул дязаннивсса Лениннул комсомолданул цIанийсса паркраву. Утти вай гьантрайгу шикку бигьалаглагисса халкьуннан бахшишран бивхьунни цIа кусса скамейка.

З. АьбдурахIманова
Европанаву ва Американаву каши дунал ччянияцIара дусса дур аьдат халкьуннан хъинбалдаран цалла цIардугу чирчусса скамейкарду бишайсса. Мукунсса скамейкарду бусса бур Вена, Мюнхен, Лондон шагьрурдал паркирдаву. Скамейкарду шагьрулун бахшишран бишайсса бур кулпатирттал, ишбажаранчитурал, фирмардал ва личIи-личIисса компаниярттал харж-хуржирайну.
Циванни ххуймур, хъинмур жучIавагу тикрал къабан? Бю­хъайхха укун чаннасса давур­ттал халкь чантI учин бувну, цив­ппа яхъана­хъисса хIаятралгу, кIичIираваллилгу, шагьрулулгу кьимат буну, чил захIматгу бурув­ччуну, марцIшиву ядуллан.