Яла чIявусса цIу ларчIсса ишру хъанахъисса дунияллул ххюра хIукуматравух Аьрасатнал билаятгу бур. ЦIу ларчIсса кIанттурдай оьрмулуцIа хьусса инсантурал ккал хIисав дурну, жува хьхьичIва-хьхьичI буру.

ЦIанасса чIумал, учительтурал, дуклаки оьрчIал цIарая мюхчан хьунсса чаран къалякъаву сававну, цIу ларчIсса ишру хаснува чIявусса хъанай бур школарттай. Директортуран, учительтуран ва махъсса циняв зузалтран, мукунма дук­лаки оьрчIан, кIулну дикIан аьркинссар ва дуруччин аьркинссар цIарая мюхчан шаврил низам, ца къахьунмур хьурча, цIу ччяни лещан дансса ва инсантал кьатIув буккан бансса чаран лякъин аьркинссар.
ОьрчIру бусса идарартту цIарая мюхчан бансса чаран ля­къин аьркинссар директортурал ва заведующийтурал. Ми ялув бавцIуну бикIан аьркинссар дук­лаки оьрчIал ва учительтурал цIарая мюхчан шаврил низам дуруччиншиврул, чIун-чIумуй дуван аьркинссар зузалтращал багьайсса инструктаж. Инструктаж къакIулми къабитан аьркинссар зун.
ОьрчIру бусса идарарттай дирхьуну дикIан аьркинссар цIу лещан дансса оборудование. Канил дугьайсса цIу лещан дайсса балонну лархъун дикIан аьркинссар полдания 1,5 м. лахъну, цурдагу тIайлану дацIан дурну. БучIиссар цIу лещан дайсса крандалущал шкафраву, хасъсса тумбардаву дишингу. БучIиссар пожарный стендрайн лахъангу. ЦIу лещан дай­сса балонну лахъан аьркинссар му ишла дайсса инструкция чIалансса куццуй. Ми дирхьусса шкафру ва тумбарду мукун бувсса бикIан аьркинссар, ялунма бурувгун миннуву ци журалул огнетушитель ду­ссарив кIул бан бюхъансса куццуй. ЦIу лещан дайсса балонну цирдагу ласун бигьасса, зарал къашайсса, бургъи-гъарая кIучIсса, батарейкардая, пачлия гъилишиву къананисса кIанттурдай дикIан аьркинссар.
ГОСТ-райн бувну сакин дур­сса эвакуациялул пландалуву кка­ккан бувну бикIан аьркинссар цIу лещан дайсса кьай чув дирхьуну дуссарив.
Школарттай хIадурну бикIан аьркинссар кьатIув буккансса ххуллурду, саргъунну зий дикIан аьркинссар сигнализация ва баян байсса система. ЧIавахьулттайсса панжарттугу тIитIайсса дикIан аьркинссар. ЛяличIинува мюхчан бувну бикIан аьркинссар электроприборду ишла дуллали­сса кабинетру. Дуклаки оьрчIан цукунчIав къабучIиссар учитель ягу лаборант акъана электричествалул прибордаха зун. Баччибакъулшиву дурну, дурчIун кьаритан къабучIиссар электроприборду. Даврил чIун къуртал хьуну махъ, лавкьуну кьабитайсса къатраву, холодильник личIаннин, циняв электроприборду дурккун кьаритан аьркинссар.
ЦIу ларчIсса чIумал чIявусса бала-апатI шаврил савав хъанай дур дуклаки оьрчIан мукун­сса тагьарданий цукун занакьулу бикIанссарив, ци зунссарив къакIулшиву.
Хъунмасса мюнпат бур школарттай 10-17 шинавусса дуклаки оьрчIая сакин бувсса цIу лещан дувултрал дружинарду зузи баврия. Школалул учительтуралгу, дуклаки оьрчIалгу ва масъалалух багьайсса къулагъас дарча, цIу ларчIсса ишру чIаланну чан хьун­ссия. Балики, цIу лачIурча, му ччяни лещан дан ва инсантал апатIрая буруччин бюхъанссия.
З. МахIаммадов, МахIачкъалаллал 1-мур надзорданул даврил отделданул хъунама, виваллил службалул капитан