Шин дайдирхьуния шихунмай хIакьинусса кьининин Да­гъусттаннал муххал ххуллул переездирттай 6 ДТП хьуну дур. Миннуву 8 инсаннан зарал бивну бур. Ца инсан усса кIанай къуртал хьуну ур, кIия – азарханалий. Миннавасса ца чIивисса душ бур. Ларгсса шинал вара чIумуву царагу ДТП хьуну диркIун дакъар.

---

Март зурул 15-нний, ссят 7.51 мин. хьусса чIумал, Къизлардай муххал ххуллул переездрай Тюменная МахIачкъалалив нанисса поезд №374 щуну бур И.Б. Кусаевлул бачин бувсса ВАЗ 2112 кук­лу машиналийн.
90 км. ссятрай ритлай нанисса поездрал машинистнан кия чулуха нанисса куклу машина ххал хьуну, мугьлат бакъа бацIан бувну бур. Амма манзил чIивисса бушиврийн бувну, поезд машиналийн щуну бур. Машиналул щупир И.Б. Кусаев къуртал хьуну ур. Мунащал най бивкIсса С.А. Кусаева (1986 ш.б.), Х.И. Кусаева (2013 ш.б.) ва И.Н. Рабаданова (1982 ш.б.), личIи-личIисса цIунцIияртту хьуну, Къизлардал азарханалийн бувцуну бур. Ва ишираву тахсир хьуну бур ххуллул низамрава увксса куклу машиналул щупирнай.
Май зурул 9-нний МахIач­къалалив, ссят 00.17 мин. хьусса чIумал, Тарки-Манас перегондалул переездрай поезд №7902 щуну бур К.Т. МахIаммадовлул бачин бувсса Lexus RX 350 машиналийн. Машиналул шупIирнал ххуллул низам къадурурччуну дур, гъан хъанахъисса поездрал хьхьичIух лавгун. Машиналул щупир ва пассажир цIунцIияртту хьуну Каспийскаллал азарханалийн биян бувну бур.
Май зурул 30-нний, ссят 08.20 мин. хьусса чIумал, поезд №4418 щуну бур Т.Ш. ХIамзаевлул бачин бувсса ВАЗ-2110 машиналийн. Ва ишираву тахсир хьуну бур ххуллул низам къадурур­ччуну, гъанну нанисса поездрал хьхьичIун переездрайн увксса Т.Ш. ХIамзаевлуй. Ва цувагу, ванащал най ивкIсса А.Д. Аьлиевгу (2014 ш.у.), личIи-личIисса цIунцIияртту хьуну, ЦIусса Чиркей поселокрал азарханалийн биян бувну бур.
МахIачкъалаллал отделениялул каялувчитал тавакъю буллай бур автоинспекциялул органнахь муххал ххуллурдай ДТП-тту хьун къаритансса чаран лякъияра тIий. Машинарттал щупиртурахьгу бур ххуллул низамрал тIалавшиннарду дуруччияра, дакIний битияра муххал ххуллу хъуннасса нигьачIаву дусса кIану бушиву тIий.

ХIурмат бусса
щупиртал!

ЛичIлулну бикIияра, му­ххал ххуллул переездрачIан гъан хьусса чIумал, буругияра светофорданух, бацIан бувара салондалувусса гъалгъарду, переездрачIан бивсса чIумал, бацIан бувара машина, ххуллу булара поездрахьхьун. ДакIний битияра, поезд га цIана бацIан бан къашайссар.
Мюхчан бувара зулагу, цайминналгу оьрмурду. Аьрххи-ххуллу тIайлабацIусса хьуннав.
С. МахIадов,
Инфраструктуралул МахIачкъалаллал отделданул хъунама
ХIадур бувссар
А. Аьбдуллаевал