Июньдалул 20-нний Дагъусттаннал БакIчи Рамазан Аьбду­л­латIиповлул дунни ДР-лул Мюхчаншиврул советрал батIаву. Ххал бигьлай бия республикалийсса базарду тIайлану зузаврил масъала.

Рамазан АьбдуллатIиповлул увкусса куццуй, базардал давуртту законнацIун даркьуну дачин даву – цачIуну щаллу буллан аьркинсса масъалар, микку гьуртту хьун аьркинссар властьрал федерал ва республикалул органну, кIанттул цилакаялувшиврул органну, мукунма Дагъусттаннай зузисса контрольданул ва надзорданул органну.
«Жува зий буру рынокрал экономикалул тагьарданий, амма базардал давуртту дуллай бакъар правалул нормардайну. Гьарма цалла даврий зун аьркинссар цалла жаваблувшиву кIулну, жува инсантурал мюхчаншиврия ва муштаринал ихтиярдая гъалгъа тIийгу бухьувкун. Ишбажаранчитуран тIурча, аьркинссар дузал дуван паччахIлугъращалсса захIматрал арарду. ХIакьину ми масъаларттах къулагъас дуллай бакъар. Мунияту на тапшур буллай ура Дагъусттаннал ХIукуматрал вице-премьер Шамил Исяевлуйн ихтиярду дуруччай органнащал ва ДР-лул Роспотребнадзорданущал цачIу ми давуртту низамрайн дуцин. Жухьра ихтияр дакъассар базарду лакьин, цайми къатIивтIуну буна», — увкунни Да­гъусттаннал БакIчинал.
Ганал мукунма ДР-лул Ростехнадзорданийн ва МЧС-райн тапшур бунни базардаву цIараясса нигьачIаврил масъаларттах къулагъас ххи дуван. Налогирттал къуллугърал вакилтурайн тапшур бунни чялишну ашкара буллан ишбажаранчишиву дуллалисса инсантал, ми сияхIрайн ласуншиврул. «БачIиссаннуяр ххишаласса ишбажаранчитал сияхIрайн лавсун бакъар налогирттал органнай. На лаизлай ура дагъусттанлувтурайн: мадулларди кьюлтIсса взносру, щиннив къакIулну! Дур яла чанмур налог, дула – яла зузу паракьатну. Ирчи Къазахълул кучалийсса базар ччувччуну махъ ишбажаранчитал бувкIуна Республикалул БакIчиначIан ва шагьрулул мэрначIан, закондалийну сияхIрайн лавсун бакъанма. Гьай-гьай, жу бугьарду халкьуннал, яни ишбажаранчитурал, чул, амма му ишираву миннан чан-кьансса бакъа кумаг бан бюхълай бакъар», — увкунни Рамазан АьбдуллатIиповлул.
Базардал давурттал хIакъираву хъунмур ихтилат бунни ДР-лул ХIукуматрал вице-премьер Шамил Исяевлул. Мунал бувсунни цуми шагьрурдай циксса базарду буссарив, ми цукун зий буссарив, миннул тагьар ци дуссарив, цукунсса дахханашивуртту хьун дурссарив махъсса ппурттуву.
БатIаврий ихтилат бунни ДР-лул МЧС-рал управлениялул хъунама Нариман КъазиахIмадовлул. Мунал бувсунни базарду ххал бивгьуну ляркъусса диялдакъашивуртту духлаган даврил хIакъираву.
Ихтилатру бунни мукунма Ма­хIачкъалаллал мэр Муса Мусаевлул, Дарбантуллал бакIчи Малик Баглиевлул ва Хасавюртуллал бакIчи Зайнуттин Окмазовлул.
БатIаврил хIасиллу дуллай, Рамазан АьбдуллатIиповлул увкунни: «Ирчи Къазахълул кучалий­сса базаллувугу, ЦIунтIиял райондалийсса МокIокIуллал шяравугу, цайми кIанттурдайгу цIурду дагьаврил ялун личин бунни ца хъунма­сса масъала – жуща бюхълай ба­къар анаварну ва щаллуну кумагран арцу итадакьин республикалул бюджетравату. Му мукун хъанахъиссар циняв доходрал арцурду бюджетрал чIарах дуклай дуну тIий. Къахъанай бур федерал бюджетраватугу кумаг тIалав бан мува зат сававну. Утти жун хъинну захIмат хъанай бур компенсация, яни зарал лахъаву дансса арцу ласун. Мунияту бигьану бикIанссия инсантал цIу дагьаврия буруччин, агарда ми закондалийну зий бивкIссания.
ХIадур бувссар ХIасан Аьдиловлул