Назраннай ва зурул 14-нний къуртал хьусса Аьрасатнал чемпионатрал махъра-махъмур кьини лачIун буклай бия чурххал кIушиврул 65,74 ва 97 килордай.
101 лачIунукку тамахI бивхьуну ия хьхьичIунми кIанттурду бугьан. Га кьини лачIун къаувккуна 65 килорал кIушиврий Европанал чемпион Илияс Бекбулатов, мунил савав хьуну дур ганан цIунцIия шаву. Мукуна лачIун къаувкIун ур Европанал чемпионатрай чарвитул медаль ларсъсса АхIмад ХIажимахIаммадовгу (74 кило).
Ва ххуллух олимпий чемпион Аьбдурашид Сяъдуллаев лачIун уклай ия уттинин цува лачIун уклай ивкIмунияр лахъсса чурххал кIушиврий – 97 килорай. Финалданий Аьбдурашид лачIун увккуна хъинну итххявхсса лачIунукку Владислав Байцевлущал, 8:7 счетращал ххув хьуна Дагъусттаннал лачIунукку.
86 килорал кIушиврий Дагъусттаннал лачIунбуккултран мяркьу хьуна. Му кIушиврий ххув шайва я Аьбдурашид Сяъдуллаев, ягу Шамил КIудиявмахIаммадов. Мяйжанссар махъсса ппурттуву хьхьичIун ливчуна гьашину Европанал чемпион хьусса Даурен Кюругълиевгу. Амма му ух хьуна цала ватанлув Арсенаьли Мусалаьлиевлуяр. Полуфиналданий Арсенаьли ух хьуна Ухссавнил АьсатIин-Аланиянавасса Владислав Валиевлуяр. Финалданий тIурча, Валиев ххув хьуна жула Шамил КIудиявмахIаммадовлуяр 4:1 счетращал ва хьуссар 2017 шинал Аьрасатнал чемпион. Шиккува бусан, Шамил цимилагу ххув хьуссар хьхьичIми шиннардий Владиславлуяр, вай ччянияцIавасса муттаэталли.
58 килорал кIушиврий мусил медальданийн тамахI бивхьуну ия Дагъусттаннал кIия лачIунуккул: Заур Угуевлул ва Артем Гебековлул. Финалданий Заур Угуев ххув хьуна 2:1 счетращал.
125 килорал кIушиврий финалданий МахIаммадхIажи Нурасулов ух хьуна Анзор Хизриевлуяр 2:3 счетращал.
Медаль дакъа ливчIуна 70 килорал кIушиврий лачIун уклай ивкIсса Дагъусттаннал хьхьичIунсса спортсмен МахIаммад Кьурбанаьлиевгу, четвертьфиналданий му ух хьуна АьсатIиннал лачIунукку Давид Баевлуяр. Амма полуфиналданий Баев цувагу ух хьуна МахIачкъалалиясса МахIаммадхIабиб КьадимахIаммадовлуяр. Му ххув хьуна полуфиналданий дукIусса Аьрасатнал чемпион Заурбек Садикьовлуяр (Аланиянавасса). Ахирданийгу 70 килорай ххув хьуна КьадимахIаммадов.
61 килорал кIушиврий финалданий дагъусттанлув ХIажимурад Рашидов ххув хьуна Якутнал лачIунукку Виктор Рассадиннуяр 3:3 счетращал, цIу бутIуй Рассадин ххув хъанай ия 2:1 счетрайну, амма махъсса ппурттуву Рашидовлул лавсуна ялагу 2 балл, мунияту жулама лачIунукку ххув хьуссар.
ХIасан Аьдилов
